Buntal

?Iwak Buntal
	; Ilustrasi iwak buntal
Klasifikasi ilmiah
Karajaan:	Animalia;
Ordo:	Tetraodontiformes;
Famili:	Tetraodontidae;

Iwak buntal atawa ngaran ilmiahnya Tetraodontidae adalah salah sabuting macam iwak sungai wan laut nang baasal matan ordo Tetraodontiformes. Iwak-iwak sarupa nang tamasuk janis ngini mirip wan iwak landak nang baisi tulang balakang ganal (kada kaya tulang balakang Tetraodontidae nang tatipis, tasambunyi, wan kalihatan pas iwak ngini manggalambung). Ngaran ilmiahnya ngini diambil matan ampat buting gigi ganal nang tapasang di rahang atas wan bawah nang dipakai gasan mahancurakan cangkang krustasea wan moluska, makanan alami bubuhannya.^[1]

Racun Buntal

Iwak buntal dianggap sabagai binatang batulang balakang nang paling bawisa kadua di dunia imbah kuduk amas baracun. Urgan-urgan dalam nang kaya hati wan jua kulit binatang ngini bahanu baracun banar amun dimakan. Parak samunyaan iwak buntal mangandung tetrodotoxin wan saxitoxin. Tetrodotoxin marupakan zat nang maulah iwak buntal tarasa kada nyaman wan jua mamatiakan gasan nang handak mamangsanya. Imbah itu, saxitoxin bisa maikat saluran natrium di saraf wan utut. Janis racun ngini bisa mahaur sinyal ka saraf. Gangguan sarap ngini maulah utut tarasa lamah. Kada utut garak aja, tapi utut di urgan lain gin taumpat jua bamasalah. Gasan manusia, tetrodotoxin wan saxitoxin bisa maulah mati. Anggapan racunnya bisa 1.200 kali labih bahaya matan sianida. Dalam saikung iwak buntal sudah mangandung racun nang kawa mamatii 30 urang tuha wan sampai wahini masih kadada tatambanya.^[2]

Darajat Karacunan Buntal

Karacunan iwak buntal kada langsung manyabapkan kalumpuhan wan kamatian. Ada babarapa tingkat karacunan nang bahanu tarasa di awak. Ada ampat tingkat gajala karacunan iwak buntal nang tarasa matan 20 manit sampai 2 jam imbah mamakannya. Magin tinggi kadar racunnya, magin parah jua karacunannya.^[2]

Tingkat 1

Di tingat awal ngini awak mulai mati rasa, kasamutan, rasa padih tacucuk, wan ada rasa panas tabakar di muntung wan bibir, habis itu manjalar ka tangan wan batis. Di tingkatan ngini jua parut tarasa maula-ula.

Tingkat 2

Di tingkat nang kadua di muha wan di babarapa bagian awak lainnya mati rasa. Mulai muncul ciri-ciri kalumpuhan, bagarak rasa ngalih, bapandir kaya urang pilat, tapi riplik masih nurmal.

Tingkat 3

Pas sudah ada di tingkat tiga,utut makin tarasa lamah, sasak bahinak, kada kawa basuara, lawan pupil mata baganal, tapi masih kawa sadar.

Tingkat 4

Tingkatan pahabisan ngini adalah tingkat karacunan buntal nang paling parah. Hinak sudah barat banar, oksigen bakurang, takanan darah barandah, datak jantung kada manantu, bisa siup bahkan sampai maninggal.

Manpaat

Biarpun dianggap baracun banar, tapi ada babarapa janis iwak buntal nang kawa diulah makanan. Di Japang (disambatnya fugu), Kuria, wan Cina daging buntal biasanya diulah ulih tukang masak nang sudah tahu banar lawan bagian mana aja nang kawa dimakan wan sabarapa banyak kadarnya bulih masuk ka dalam awak. Iwak buntal aslinya baisi manfaat nang baik gasan awak asalkan bisa mamasaknya sampai aman dimakan. Dalam daging iwak buntal tadapat protein, leusin, wan asam lamak.

Kandungan protein di iwak buntal kawa manguatakan tulang, utut, kulit, wan rambut, mambaiki jaringan nang rusak dalam awak, malancarakan prusis pancarnaan, maatur hormon, mambari tambahan hemoglobin ka sil darah habang supaya kawa mambawa oksigen wan zat gizi ka awak, mangurangi rasa lapar wan maikat rasa kanyang. Leusin nang ada dalam buntal baisi manpaat nang kurang labih sama lawan protein, yaitu mambangun wan mambaiki utut. Asupan leusin nang mancukupi jua kawa mambantu mangurangi ancaman pahalusan utut kayah urang-urang tuha. Habis itu, leusin jua mambantu mangandaliakan kadar gula darah. Leusin mambantu mahisap glukosa ka dalam sil utut wan maulah awak labih baik pas marispun insulin. Asam lamak nang paling banyak tadapat dalam iwak buntal adalah asam butirat. Sabujunya, asam butirat ngini biasanya diulah ulih awak pas sudah mancarna serat wan pati risistin. Asam butirat mambari energi gasan sil-sil di usus ganal. Amunnya energi tacukupi, usus ganal kawa bagawi maksimal.^[2]

Makanan

Makanan iwak buntal kabanyakan nang kaya invertebrata wan ganggang. Buntal jua kawa mamakan karang wan rimis maraga baisi paruh nang karas. Iwak buntal baracun banar maraga katuju mamakan makanan nang mangandung banyak bakteri wan kuman. ^[3]

Populasi

Tetraodontidae paling sadikitnya ada 121 spesies iwak buntal nang tabagi dalam 20 marga. Iwak ngini banyak macamnya di pambanyuan trupis, bahanu ada di pambanyuan wilayah sadang, wan kadada di pambanyuan nang dingin. Iwak ngini ukurannya ada nang halus sampai sadang, tapi babarapa janis ada nang baisi panjang 1 mitir (39 inci) labih.^[4]

Daptar Jujuhutan

^ "Jangan Dimakan, Ikan Buntal, Vertebrata Paling Beracun Kedua Setelah Katak Racun Emas - Islampos" (dalam bahasa Indonesia). 2020-10-04. Diakses tanggal 2023-03-12.
^ ^a ^b ^c "Ikan Buntal Tetap Bisa Dimakan meski Punya Racun Mematikan". Hello Sehat (dalam bahasa Indonesia). 2022-05-30. Diakses tanggal 2023-03-26.
^ Media, Kompas Cyber (2022-01-06). "Fakta-fakta Ikan Buntal, Ikan Menggemaskan dengan Racun Mematikan Halaman all". KOMPAS.com (dalam bahasa Indonesia). Diakses tanggal 2023-03-26.
^ "Apa saja jenis jenis ikan buntal ?". Dictio Community (dalam bahasa Inggris). 2018-05-06. Diakses tanggal 2023-03-12.

[1] "Jangan Dimakan, Ikan Buntal, Vertebrata Paling Beracun Kedua Setelah Katak Racun Emas - Islampos" (dalam bahasa Indonesia). 2020-10-04. Diakses tanggal 2023-03-12.

[:0-2] "Ikan Buntal Tetap Bisa Dimakan meski Punya Racun Mematikan". Hello Sehat (dalam bahasa Indonesia). 2022-05-30. Diakses tanggal 2023-03-26.

[3] Media, Kompas Cyber (2022-01-06). "Fakta-fakta Ikan Buntal, Ikan Menggemaskan dengan Racun Mematikan Halaman all". KOMPAS.com (dalam bahasa Indonesia). Diakses tanggal 2023-03-26.

[4] "Apa saja jenis jenis ikan buntal ?". Dictio Community (dalam bahasa Inggris). 2018-05-06. Diakses tanggal 2023-03-12.

[1]

[2]

[3]

[4]