Cao Dai

Cao Dai marupakan agama nang didiriakan ulih Ngo Van Chieu (1878-1932) di Vietnam pas tahun 1926. Cao Dai baisi arti "andak nang tinggi" atawa andak nang paling tinggi dimana Tuhan baada. Agama Cao Dai baisi unsur (sinkretisme) matan kaparcayaan Buddhisme, Taoisme, Konfusianisme, wan keresten. Jumlah pangikutnya diparkiraakan sakitar 2-3 juta ikung di Vietnam wan sapalihan nagara nang lain. Lawan jua ada nang mangira-ngiraakan pangikutnya mancapai 6-8 juta ikung urang. Cao Dai bakambang jua di Amirika Sarikat, Irupa, wan Australia.

Kuil "Tahta Suci" Cao Dai nang baandak di Tay Ninh, Vietnam. Kuil ngini marupakan pusat ajaran Cao Dai

[1]

SajarahSunting

 
Simbol agama Cao Dai nang hirip kaya simbol Eye of Horus

Pas tahun 1921, Ngo Van Chieu, mangaku dapat pasan matan Cao Dai (Tuhan) wan manarima visi barupa Mata Ilahi nang wayah ini dipakai gasan simbol Cao Dai lawan jua sabagai fokus dalam baibadah di sabarataan altar Cao Dai. Simbol Mata Ilahi ngini mirip nang kaya simbol Eye of Horus nang dipakai jua oleh parsaudaraan Freemasonry. Imbah ngitu inya mulai manyabarakan wan maajarakan agama hanyar ngini gasan urang banyak di Vietnam wan maalami parkambangan nang lumayan hancap. Misi Cao Dai adalah gasan maulah Iman hanyar gasan kasalamatan makhluk hidup sabalum tajadinya kiamat. Tujuan utamanya adalah kasatuan samunyaan agama, nang pacangan mambawa umat manusia kadalam sabuting kula universal gasan mancapai pardamaian universal.[1]

Manurut Cao Dai, sabalum ada sagala sasuatu, nang ada waktu ngitu Tao wara, Tao adalah sambatan gasan nang kada baisi ngaran, kada babantuk, kada baubah, wan sumber nang abadi matan sagala hal. Tuhan kamudian mambagi awaknya wan manciptaakan aspek Yin wan Yang. Wayah ada Yin wan Yang ngini, dunia wan alam samasta hanyar diulah, prinsip-prinsip positif wan negatif matan samasta alam ngini nang jadi kumpunin matan alam samasta. Ada dua Dewa utama dalam Cao Dai, yaitu Cao Dai "Tuhan nang Paling Tinggi" atawa Tuhan Bapa wan Dieu Tri Kim Mau atawa "Bunda Suci". Buhannya ngini masing-masing mawakili kakuatan Yin wan Yang. Cao Dai dipandang sabagai jantung matan alam samasta wan abah matan sagala makhluk. Inya mananamakan bagian matan diri inya ka sagala makhluk hidup, tamasuk batu, tumbuhan, binatang wan manusia. Dieu Tri Kim Mau dihormati sabagai sabagai umanya alam samasta, nang batanggung jawab gasan mambari bantuk nang talihat (realitas fisik), kasadaran, wan emosi gasan samunyaan kahidupan.[1]

Kitab SuciSunting

Cao Dai baisi banyak kitab suci nang diantaranya adalah Kinh Thiên Dao Va Dao (Doa Surgawi wan Jalan Duniawi), Phap Chanh Truyen (Hukum Agama Caodaisme), Tân Luat (Kode Kanonikal), Thanh Tuyen Ngon Hiep (Koleksi Pasan Ilahi), Cao Durong Thieng Lieng Hang (Jalan Ilahi Manuju Kahidupan Kakal), wan Khotbah Pham Cong Tac.

Ada sapuluh bagian dalam Kitab Suci Cao Dai nang isinya nang kaya ini:

  1. Tingkatan Buhan Pamuka Agama
  2. Inisiasi wan Bubuhan Urang-Urang nang Parcaya
  3. Paulahan Parorki
  4. Lima Tatangatan
  5. Ampat Suruhan
  6. Pandidikan
  7. Sanksi
  8. Pancabutan Undang-Undang wan Paraturan
  9. Aturan Sakulir
  10. Rumah miditasi[1]

Struktur UrganisasiSunting

 
Pangikut agama Cao Dai baibadah di Kuil buhannya, Pandita mamakai baju bawarna habang, biru, wan kuning. Pangikutnya mamakai baju bawarna putih

Ada kasamaan antara tingkatan pamuka agama Cao Dai lawan Garija Katulik. Salain Paus, tingkatan pamuka agama Cao Dai baisi Kardinal, Uskup, Imam, wan pamuka agama lainnya. Ada sambilan tingkatan pamuka agama dalam agama Cao Dai:

  • Asa Paus
  • Talu Sinsor Kardinal 
  • Talu Kardinal
  • Talu puluh anam Uskup Agung
  • Pitu puluh dua Uskup
  • Mahasiswa Pandita (kada babatas)
  • Subdignitaris (kada babatas)
  • Pangikut (kada babatas)[1]

Ibadah wan Tampat baibadahSunting

Sakitar 90 kilumitir di subalah barat Saigon di Provinsi Tay Ninh ada Kuil buhannya nang bangaran Tahta Suci Cao Dai. Kuil ngini marupakan campuran matan babagai agama di dunia. Disainnya marupakan campuran sabuting Masigit wan Klenteng, lawan warna-warna mancolok lawan lukisan rumit nang kaya istana zaman bahari. Lain pada pusat ziarah atawa baibadah, tahta suci ngini marupakan salah satu ubjek wisata jua bagi buhan turis.

Ibadah buhan panganut Cao Dai digawi pas jam 6 pagi, 12 tang hari, 6 kamarian, wan 12 malam. Babuhan jamaah mamakai baju nang kaya biksu bawarna-warni wan manyanyiakan lagu-lagu pujian dalam sabuting barisan. Warna biru malambangakan Tao, warna kuning malambangakan Buddha wan habang malambangakan Konghucu. Panganut agama Cao Dai manggawi ritual doa jua, manyambah urang bahari, prinsip kada pakai kakarasan, wan vegetarian nang batujuan supaya kawa manyatu lawan Tuhan wan tabibas matan samsara (ruda riinkarnasi).[1]

Catatan BatisSunting

  1. ^ a b c d e f Mohammad Zazuli, Sejarah Agama Manusia, (Jakarta: Buku Seru, 2019), cet.II