Demam bedarah
Demam bedarah atawa demam dengue (disingkat DBD) marupakan inféksi nang disababakan virus Dengue nang dibawa nyamuk ka manusia. Virus dengue ngini ada 4 macam, yaitu DEN-1, DEN-2, DEN-3, wan DEN-4. Virus ini kada manular mulai manusia ka manusia, harus ada nyamuk nang mambawa. Ngaran nyamuknya Aedes aegepty lawan Aedes albocpictus. Nyamuk ini biasanya hidup di daerah antara garis lintang 35° Utara dan 35° Selatan, di bawah katinggian 1000 m. Nyamuk-nyamuk paling katuju maigut mun siang-siang. Nyamuk ini lakas banar tumbuh wan bahintalu di banyu, magin mun musim panghujan.[1]
Di dunia ni kajadian nang takana DBD batambah tarus. Nang dipadahakan ka WHO (Urganisasi Kasihatan Dunia) tahun 1996-2005 ada sakitar 0,4 juta sampai 1,3 juta dalam satahun nang takana DBD. Tahun 2010 sampai 2,2 juta, pas 2015 jadi 3,2 juta. Indonesia tamasuk urutan kadua paningginya kajadian takana DBD. Di Indonesia ini kabanyakan dairahnya endemis DBD artinya saban tahun ada tarus nang takana panyakit ini. Biasanya mun sudah takana, ada cirinya yaitu tetiba awak panas tinggi, sakit kapala, sakit balakang bula mata, sampai kaluar darah. Kaluar darah ini paling rancak mimisan atawa kaluar darah datang hidung, bisa jua gusi badarah, ada jua nang bintik-bintik habang aja di tangan lawan batis.[1][2][3]
Urang nang sudah digigit nyamuk Aedes nang ada virus Denguenya jadi infeksius salama 6-7 hari. Virus Dengue tadi masuk kadalam pambuluh darah manusia lawan liur nyamuk, salanjutnya virus manyarang sel darah putih. Lalu muncul ciri awak panas wan awak sakitan ngilu sampai ka tulang.[3]
Fase demam badarah babak
Ada talu fase DBD, yaitu:[1]
- Fase nang panambayan atawa hari pamulaan sampai hari katalu, cirinya panas tinggi lamun diukur mamakai termometer bisa sampai 40 darajat selsius wan awak asa sakitan;
- Fase kadua atawa hari katiga sampai hari kalima, cirinya panas mulai turun nangkaya urang sudah wagas, padahal ini fase kritis. Paling rancak nang ada pandarahan atawa trombosit turun pas fase ngini;
- Fase katalu atawa hari kaanam sampai hari katujuh, ini mulai pamulihan, panas sudah turun, lamun diperiksa di laboratorium trombosit sudah mulai naik jua.
Pambagian pandarita DBD babak
Manurut WHO, urang nang takana DBD dibagi jadi ampat macam, yaitu:[3]
- Darajat I, awak panas lawan tes Rumple Leed positif
- Darajat II, ada pandarahan kontak, misalnya mimisan atau bintik habang di kulit
- Darajat III, ada tanda gagal paridaran darah, danyut nadi laju tapi lamah, tensi turun, awak dingin, galisah
- Darajat IV, syok, denyut nadi kada tarasa lagi, tensi kada kawa diukur lagi
Usaha mahindari DBD babak
Supaya kita kada katularan DBD, pamarintah sudah manyuruh kita manggawi 3M Plus. Kita disuruh manggawi:[4]
- Manguras wan manyikat wadah panampungan banyu, bak mandi, derum, ember, panampungan banyu di kulkas
- Manutup rapat wadah panampungan banyu supaya nyamuk kada kawa maulah sarang
- Mamanfaatkan pulang limbah barang kada tapakai supaya kada jadi wadah nyamuk baintalu
Plusnya yaitu mamalihara iwak pamakan jantik nyamuk, mambubuhi larvasida di panampungan banyu nang ngalih dibarasihi, mamakai ubat nyamuk, mamakai kalambu guring, mamasang kawat kasa di jandila, rajin babarasih kampung, baju bakas dipakai jangan dituyuk dibalakang lawang, rajin mambuka jandela supaya cahaya masuk, kada manggantung baju didalam rumah nang biasanya jadi wadah nyamuk basarang, mambaiki saluran banyu supaya lancar, wan mananam tanaman nang kada dikatujui nyamuk.[3]
Lamun orang saduh talanjur takana DBD, harus lakas diubati. Dibari cairan kawa lewat minum banyu (bulih minum susu, jus buah, oralit) atawa lewat inpus, ubat gasan mangurangi gajala nang kaya Parasetamol, lawan harus tatap dihagai. DBD ini komplikasinya macam-macam, ada yang sampai kamatian, makanya sebilanya sudah masuk musim panghujan sudah ada tatangga nang kana DBD, kita harus waspada jangan sampai kita katularan.[3]
Kekira akhir tahun 2015, sudah ada vaksin gasan virus Dengue ngarannya Dengvaxia. Vaksin ini sudah dianjurakan WHO gasan nagara nang tinggi kajadian DBD-nya. Vaksin Dengvaxia ini dibari 3 dusis ke kekanakan umur 9-16 tahun. Tapi vaksinnya ini kada bulih dibari ka urang nang ada riwayat alergi, kakabalan tubuh turun, takana HIV, batianan wan manyusui, wan urang nang lagi panas awak.[5]
Referensi babak
- ^ a b c Superadmin. "Demam Berdarah". Direktorat Promosi Kesehatan Kementerian Kesehatan RI (dalam bahasa Inggris). Diakses tanggal 2021-04-18.
- ^ "Daerah endemik demam berdarah". bencana-kesehatan.net. Diakses tanggal 2021-04-18.
- ^ a b c d e "Demam Berdarah Dengue (DBD)". www.papdi.or.id. Diakses tanggal 2021-04-18.
- ^ Superadmin. "Upaya Pencegahan DBD dengan 3M Plus". Direktorat Promosi Kesehatan Kementerian Kesehatan RI (dalam bahasa Inggris). Diakses tanggal 2021-04-18.
- ^ "Vaksin Demam Berdarah Dengvaxia, Penggunaannya Harus Hati-hati". Info Farmasi Terkini Berbasis Ilmiah dan Praktis (dalam bahasa Indonesia). 2019-05-02. Diakses tanggal 2021-04-18.