Garéja Yésus Sajati

"Garéja Yésus Sajati" adalah garéja non-dénominasi (mandiri) nang didiriakan di Béijing, RRC wayah tahun 1917. Garéja ini dimulai di banua Cina wayah tahun 1900-an, di antara bubuhan Garéja-garéja Protestan, samantara jua téologinya baakar kapada Garakan Pentakosta. Pada 1939, Injil dihutbahakan ka Indonésia, imbah itu Garéja Yésus Sajati didiriakan jua di Indonésia. Sabarataan anggota jamaah Garéja ini sakira 1,5 juta ikung jumlahnya nang ada di lima benua. Ada sapuluh kaimanan nang paling panting Garéja Yésus Sajati yaitu:

  1. Panarimaan Roh Kudus: Panarimaan Roh Kudus, nang dibuktiakan lawan bahasa roh adalah jaminan kita gasan mandapatakan Karajaan surga.
  2. Baptisan banyu: Baptisan banyu adalah sakramen gasan panghapusan dosa di wayah kalahiran baasa/kalahiran pulang kaina. Baptisan harus digawi di banyu nang maalir sacara alami, nangkaya sungai, laut, atawa mata air (guntung). Pambaptis nang sudah manarima baptisan banyu wan jua baptisan Roh Kudus, manggawi baptisan di dalam ngaran Tuhan Yésus Kristus. Wan jua urang nang dibaptisakan harus sabukuan awak masuk ka dalam banyu lawan kapala nang batunduk wan muwastu bahadap ka bawah jua.
  3. Sakramen pambasuhan batis: Sakramen pambasuhan batis mambada'i saikung urang kawa umpat ambil bagian baimbay sasamaan lawan Tuhan Yésus. Sakramen nang ini bafungsi jua sabagai parikatan tarus-manarus bahawa kita harus baisian kasih, kasucian, karandahan hati, pangampunan wan palayanan. Tiap urang nang sudah manarima baptisan banyu musti dibasuh batisnya di dalam ngaran Yesus Kristus. Basuh-mambasuhi batis kawa digawi waktu apa haja kabila dianggap parlu.
  4. Parjamuan kudus: Parjamuan kudus adalah sakramen gasan maingatakan kamatian Tuhan Yésus Kristus. Hal nang ini mambada'i kita maambil bagian dalam daging wan darah Tuhan kita wan basakutu lawan Sidin supaya kita kawa mandapatakan kahidupan kakal wan dibangkitakan wayah akhir zaman. Sakramen ini digawi sarancak-rancaknya. Hanya sabuting roti nang kada baragi wan jus anggur nang dipakai.
  5. Hari Sabat: Hari Sabat yakni hari nang katujuh (Sabtu), adalah hari nang kudus, nang dibarakati wan disuciakan ulih Allah. Hari Sabat diparingati di bawah anugerah Tuhan gasan mamparingati panciptaan wan kasalamatan matan Allah, wan jua sambil baharap kaina kawa mandapati istirahat nang kakal di dalam kahidupan imbah mati.
  6. Yésus Kristus: Yésus Kristus, Firman nang manjadi daging, sumalah di kayu salib gasan panabusan urang badosa, dibangkitakan baasa wayah hari katiga wan naik ka surga. Sidin pang saikung-ikungannya juru salamat manusia, Pancipta langit wan bumi, wan satu-satunya Allah sajati
  7. Alkitab: Alkitab nang tasusun atas Perjanjian Lawas wan Perjanjian Hanyar, diilhami ulih Allah, satu-satunya kabanaran Alkitabiah, wan ukuran gasan kahidupan Kristen.
  8. Kasalamatan: Kasalamatan dibarii ulih anugerah Allah malalui iman. Urang parcaya/urang baiman harus maandalkan Roh Kudus Suci gasan hidup di dalam kasucian, gasan mamuliakan Allah, wan jua gasan mangasihi sasama manusia.
  9. Garéja: Garéja Yésus Sajati, didiriakan ulih Tuhan kita Yésus Kristus, malalui Roh Kudus di wayah waktu 'ujan nang paling akhir', adalah gareja karasulan sajati nang dipulihkan.
  10. Kadatangan Tuhan: Kadatangan Tuhan nang kadua kalinya kaina bakajadian di wayah akhir zaman, wayahitu Sidin turun matan surga handak mahakimi dunia: urang-urang nang banar/bujur kaina mandapati kahidupan kakal, tapi urang nang jahat kaina dihukum salawas-lawasnya.
Garéja Yésus Sajati, Fuzhou, Ripublik Rakyat Cina