Krisna
Kresna atawa Krishna (Dewanagari: कृष्ण; dilapalakan kṛṣṇa manurut IAST; dilapalkan 'kɹ̩ʂ.nə dalam basa Sanskerta) adalah salah saikung Dewa nang banyak dipuja ulih umat Hindu marga dianggap marupaakan aspik matan Brahman. Sidin disambat jua Nārāyana, adalah sambatan nang marujuk lawan paujutan Diwa Wisnu nang batangan ampat di Waikuntha. Sidin rancaknya digambarakan sabagai saurang pangambala anum nang mamainakan saruling (nang kaya pariannya dalam Bhagawatapurana) atawa pangiran anum nang mambari tuntunan pilusupis (nang kaya dalam Bhagawadgita). Dalam Agama Hindu pada umumnya, Kresna dipuja sabagai awatara Wisnu nang ka dalapan, wan dianggap sabagai Diwa nang paharatnya dalam paguruan Waisnawa. Dalam taradisi Gaudiya Waisnawa, Kresna dipuja sabagai sumbar matan sabarataan awatara (tamasuk Wisnu).
Kitap Mahabharata mamadahakan bahua Kresna asalnya tumatan Kerajaan Surasena, tagal imbah ngitu sidin manajak karajaan saurang nang dibari ngaran Dwaraka. Dalam wiracarita Mahabharata, Sidin dipinandui sabagai tukuh raja nang bijaksana, sakti, wan bawibawa. Dalam kitap Bhagawadgita, sidin adalah parantara kaparibadian Brahman nang manjabarakan ajaran kabujuran mutlak (dharma) lawan Arjuna. Sidin sanggup manampakakan sacarcah kamahakuasaan Tuhan nang wastu ditampaiakan ulih talu urang wayah parang kulawarga Bharata cagar balangsung. Katalu urang ngitu adalah Arjuna, Sanjaya, wan Byasa. Tagal, Sanjaya wan Byasa kada malihat sacara langsung, malainakan malalui mata batin bubuhannya nang manyaksiakan parang Bharatayuddha.