Pesut Mahakam
Pesut mahakam atawa basa latinnya Orcaella brevirostris adalah ngaran satwa mahirip lumba-lumba nang rancak ditamui di sungai Mahakam nang bastatus handak punah. Pesut Mahakam tamasuk ka dalam satwa nang manyusui lawan rancak juwa disambat lumba-lumba banyu tawar. Bubuhan panaliti matan barat maminandui satwa ngini lawan ngaran Irrawaddy Dolphin.[1] Halian di sungai Mahakam, Pesut ngini juwa rancak di tamui di muhara-muhara sungai di Asia Tenggara nangkaya di sungai Mekong nang malintasi Kamboja duwa Laos.[2]
Biar Pesut batambah ngaran Mahakam, lamun panambayannya satwa ngini ditamui lawan Sir Richard Owen pas 1852 di palabuhan Visakhapatnam di Pantai Timur India. Ngaran lainnya dalam basa lain adalah Lampasut (Pilipina), Shushuko (Bengali), Pa’kha (Laos) lawan Eyawadi lăbaing (Myanmar).[3] Adapun pambarian ngaran pesut ngini marga suara nang timbul matan inya banapas. [4]
Kisah rakyat
babakLamun ujarnya kisah rakyat matan Kalimantan Timur, pesut adalah paujutan dua kakanak badingsanak nang diinggalakan abahnya sampai baubah jadi pesut, nang wahini dipinandui sawagai pesut mahakam. Urang Kutai manyambat ‘ujut’ ngintu lawan pesut atawa pasut, lamunnya urang padalaman Mahakam mangaraninya bawoi.[5]
Taksunumi
babak.jpg)
Satwa ngini dilainakan matan sapupunya Pesut Australia manurut bantuk tangkurak duwa siripnya.[6][7] Pesut masuk ka dalam kalumpuk lumba-lumba wan paus nang bagigi. Inya banapas pakai cara maambil udara di parmukaan banyu lawan inya kawan manyambur banyu datang muntungnya,[5] gasan maulah bingung iwak nang handak dimakannya, juwa marupakan usaha pesut lakian gasan manarik parhatian pesut binian.[8] Wayah Pesut bamigrasi, inya cungul ka atas banyu gasan banapas sakira 2 sampai 5 ditik. Tagal amun kundisi taancam, pesut bisa tahan 10 minit di dalam banyu kada sing cungulan ka atas, nangkaya tabarung lawan parahu.[9]
Pesut batianan salawas 8-14 bulan, imbah ngitu baranak saikung salawas 1-3 tahun sakali marga manyusui anaknya.[10] Bayi pesut nang hanyar diranakakan panjangnya 90cm sampai 1m lawan baratnya 10-12 kg.[8] Panjang awak pesut mahakam nang ganal bisa sampai 2,3 m nang baratnya bisa 130 kg.[5] Pesut lalakian awaknya taganal pada nang bibinian.[8]
Pesut nang badiam di sungai Mahakam kada kawa dikawinakan dua Pesut nang badiam di di muhara sungai Mahakam, marga kadua satwa ngini balain sudah cara adaptasinya, maka kamungkinan balain pariannya. Tagal, Pesut nang badiam di Taluk Balikpapan masih kawa dikawinakan duwa Pesut nang di Penajam Paser Utara. [4]
Pesut lakian mulai kawin rahatan umur 5-6 tahun wan binian di umur 9 tahun, tagal biasanya umur paling pas adalah di 12 tahun. Umur pruduktip Pesut bisa sampai ma-60 tahun, nang artinya imbah 60 tahun labih, Pesut binian sudah kada kawa baranak lagi. [9] Hal ngini juwa salajur manjadi ancaman gasan kalangsungan hidup Pesut, ditambah bakurangnya atawa taganggunya makanan si Pesut, manjadikan taganggu juwa daur hidup si Pesut.[11]
Pesut baisi kapala bulat (nangkaya gumbili) nang kadua matanya nang halus marga adaptasi lawan banyu nang balicak. Awak pesut barwarna habu sampai biru kahitaman tuha, bawahnya tapucat pada atasnya duwa kada baisi panciri. Sirip balakang halus wan mambulat di panangahan punggung. Dahinya tinggi duwa mambulat, kada baparuh. Sirip dada libar mambulat.[1]
Pesut mahakam lakian nang tuha baisi timbilan ganal di gulu di balakang kapala nang disambat neck crest nang jadi panciri antara pesut lakian duwa binian.[9] Pesut baisi gigi nang banyaknya 17-20 gigi wan bagian bawahnya bajumlah 15-18 gigi, nang ukuran giginya halus haja atawa kikira 1 cm.[3]
Pesut tamasuk ka dalam satwa nang galay bakunyung, kikira wastu 25 km/jam[11], wan aktip dalam kalumpuk halus, nang jumlahnya bisa 4-12 ikung lawan dalam 1 kalumpuk pasti ada uma duwa anaknya.[9] Tagal panglihatannya kada tapi tajam wan hidup di banyu nang balicak, pesut ahlinya dalam manditiksi duwa manghindar ririntangan. Bisa jadi buhannya mamakai galumbang ultrasunik gasan baulah gema nangkaya dingsanaknya di laut,[1] gasan bacari makan, wadah makanannya baandak, bacari musuh atawa bapandiran duwa sasamanya.[10]
Pesut bacari makan kada baburu, tagal manunggui mangsa di tikungan rawa atawa anak sungai ampah sungai nang taganal.[9] Rahatan musim karing, Pesut cagaran bapindah ampah ka wilayah Kutai Barat duwa Mahakam Ulu, maumpati jalur pindahannya iwak Kendia dua iwak Repang.
Wadah bagana
babak
Kada nangkaya satwa manyusui nang hidup di banyu lainnya nangkaya lumba-lumba duwa paus nang hidup di laut, pesut mahakam hidup di sungai-sungai dairah trupis. Dikatahaui, Pesut Mahakam ngini wastu bagana di Sungai Mahakam, Sungai Mekong, lawan Sungai Irawady. Lamunnya di Kalimantan Timur, Pesut ngini kawa ditamui di intangan Danau Jempang, Danau Semayang lawan Danau Melintang.[1]
Rahatan awal tahun 2012, WWF Indonesia duwa Badan Pengembangan Sumberdaya Pesisir dan Laut (BPSPL) Pontianak kawa maabadikan titik ganaan pesut di intangan laut Kubu Raya duwa Kayong Utara, Kalimantan Barat.
Pesut Mahakam juwa ditatapakan sawagai satwa nang bagana di Taluk Balikpapan, di intangan pulau Balang. Lamun pesut ngini taancam juwa lawan pambangunan jambatan duwa paluasan palabuhan Kariangau.[12]
Jumlah
babak
Jumlah Pesut samunyaan sacara glubal tarikin ada sabanyak 6000 ikung,[13] bardasarkan data tahun 2018 jumlah satwa ngini tinggal 70-80 ikung haja di intangan sungai-sungai di Kalimantan wan paris paningginya di daptar satwa Indunisia nang handak punah.[14]
Tagal jumlah satwa ngini malah maningkat di Kamboja. Rahatan tahun 1997, dirikin wastu ada 200 ikung haja lagi Pesut nang hidup di sungai Mekong, jumlahnya umpat manurun sampai ka 2007, dirikin tasisa 95 ikung. Pamarintah pun mulai malindungi duwa mausahaakan biar jumlahnya kada tapi bakurang banyak. Sampai ka tahun 2015, tasisa 80 ikung.[2]
Usaha parlindungan ngini manamui habar baik juwa, rahatan 2017, pamarintah Kamboja mahabarakan bahuwa ada panambahan jumlah pesut jadi 92 ikung. Panambahan jumlah ikungan Pesut ngini marga usaha pamarintahnya nang manangkapi pamburu iligal duwa sawat manyita jaring sapanjang 350 km.[2]
Ancaman
babak
Ancaman pangganalnya bagi pesut ngini ialah karusakan habitat di sungai ngitu duwa jaring nang dihambur lawan paiwakan gasan manangkap iwak sakalinya malukai pesut.[2] Banyu nang surut juwa cagaran maulah Pesut bajauh mancari banyu dalam nang banyak iwaknya wan inya mampu haja bakunyung balasan mil sagan pindah.[14]
64 parsin kamatian pesut di sungai Mahakam marga tajabak rengge atawa alat tangkap iwak, nang mana iwak halus gasan makanan Pesut takumpul. Lamun ada rengge maka maundang Pesut gasan basinggah, lalu pesut taukung di rengge wan kada kawa bibas. Halian ngitu, jumlah Pesut nang magin badikit marga rawa wadah iwak-iwak halus badiam sudah baganti jadi kabun sawit. Jadinya tingkat kamatian Pesut tinggi pada tingkat baranaknya.[14]
Ancaman lainnya juwa adalah baubahnya hutan bakau wadah satwa ngini bagana gasan bahan baulah harang, bakurangnya hutan intangan sungai nang dipakai gasan baulah bubur kartas, lalu lalang kapal di sungai nang kawa maulah Pesut jadi muyak lawan barigatnya banyu sungai.[5]
Pesut juwa rancak diburu urang gasan dimakan, marga dagingnya diparcaya kawa gasan tatama gatalan.[15]
Parlindungan
babakUntuk malindungi Pesut ngini supaya jumlahnya kada magin badikit, bubuhan urganisasi lukal maadakan susialisasi ka bubuhan nalayan tarkait cara mamakai rengge nang bujur. Rengge kada bulih dipasang mahalangi sungai tapi dipasang sajalur aliran banyu. Juwa dilajari cara malapasakan pesut nang taukung di rengge.[14]
Halian ngitu, ditatapakan ampat wilayah parlindungan atawa zona konservasi di ampat kacamatan yaitu di Kota Bangun, Muara Wis, Muara Muntai dan Muara Kaman.[16] Wilayah parlindungan Pesut ngini luasnya 48 ribu ha mulai dairah rawa, susungaian, sapalihnya rawa gasan parlindungan iwak. Adanya wilayah ngini mambatasi alur balayarnya kapal tungkang ganal nang malalui anak sungai atawa muhara wadah Pesut badiam.[14]
Wayah ngini jua dipakai alat Pinger gasan mahabarakan Pesut matan jauh supaya bajauh pada jaring pas jaraknya 10-20 m matan jaring nalayan. Alat ngini mambantui Pesut supaya kada taukung ka jaring lamun masih kawa bacari iwak gasan dimakan di intangan situ. Halian ngitu, alat ngini kawa mangurangi karusakan jaring nalayan wan maningkatakan hasil tangkapan iwak buhannya.[17]
Lihati juwa
babakPranala luar
babakJujuhutan
babak- ^ a b c d Wihardandi, Aji (2014-04-26). "Pesut Mahakam Mati Terjerat". Mongabay.co.id. Diakses tanggal 2023-03-05.
- ^ a b c d "Jumlah Pesut Mahakam di Indonesia Turun, di Kamboja Justru Naik". kumparan (dalam bahasa Indonesia). 2018-04-24. Diakses tanggal 2023-03-05.
- ^ a b Anjarwati, Julia (2021-10-12). "Pesut Mahakam (Orcaella brevirostris): Habitat, Perilaku & Fakta Menarik". Forester Act (dalam bahasa Indonesia). Diakses tanggal 2023-03-05.
- ^ a b "Kenali Pesut Mahakam". www.pressreader.com. 2021-12-01. Diakses tanggal 2023-03-05.
- ^ a b c d Fajar, Jay (2014-09-08). "Pesut Mahakam, Sang Legenda yang Kian Langka". Mongabay.co.id. Diakses tanggal 2023-03-05.
- ^ Harto, Budi (2019-12-15). "Si Pesut yang Hampir Punah". Jagad Tani - Petaninya Milenial (dalam bahasa Indonesia). Diakses tanggal 2023-03-07.
- ^ Rani (2020-07-21). "Wajib Tahu! Ini Beda Pesut Mahakam dan Pesut Australia". REQnews (dalam bahasa Indonesia). Diakses tanggal 2023-03-07.
- ^ a b c Rahmadi, Noviyanto (2015). "Mengenal Singkat Pesut Mahakam". Kabupaten Kutai Kartanegara (dalam bahasa Indonesia). Diarsipkan dari versi asli tanggal 2022-09-27. Diakses tanggal 2023-03-05.
- ^ a b c d e Shukri, Iqbal (2022-09-02). "Fakta Unik Pesut Mahakam". Trubus (dalam bahasa Indonesia). Diakses tanggal 2023-03-05.
- ^ a b Wihardandi, Aji (2013-06-12). "Pesut Mahakam, Semakin Menyusut Akibat Hilangnya Sumber Pangan". Mongabay.co.id. Diakses tanggal 2023-03-05.
- ^ a b "LIPI Ungkap Penyebab Pesut Mahakam di Ambang Kepunahan". CNN Indonesia (dalam bahasa Indonesia). 2020-07-24. Diakses tanggal 2023-03-05.
- ^ R, Rahmadi (2016-11-04). "Begini, Kondisi Pesut Mahakam di Teluk Balikpapan". Mongabay.co.id. Diakses tanggal 2023-03-05.
- ^ Ramadhan, Fadhil (2021-09-28). "Satwa Langka Lumba-lumba Air Tawar Terlihat di Kalimantan Barat". nationalgeographic (dalam bahasa Indonesia). Diakses tanggal 2023-03-07.
- ^ a b c d e Taufik, Rahmad (2018-08-24). "Waduh, Populasi Pesut Mahakam Tersisa 80 Ekor, 64 Persen Mati Akibat Ini". Tribunkaltim.co. Diakses tanggal 2023-03-05.
- ^ Hidayat, Firman (2011-09-13). "Ikan Pesut Mahakam Terjaring Nelayan". Tempo (dalam bahasa Indonesia). Diakses tanggal 2023-03-05.
- ^ R, Rahmadi (2020-04-01). "Ditetapkan, Kawasan Konservasi Pesut Mahakam Seluas 43 Hektar di Kutai Kartanegara". Mongabay.co.id. Diakses tanggal 2023-03-05.
- ^ Jelfi; Ryanti, Dewi (2021-10-25). "PINGER KECIL SI PENYELAMAT PESUT". WWF-Indonesia (dalam bahasa Indonesia). Diarsipkan dari versi asli tanggal 2023-03-05. Diakses tanggal 2023-03-05.