Puteri Junjung Buih

Puteri Junjung Buih atawa Puteri Tunjung Buih adalah raja puteri matan Kerajaan Negara Dipa ujar Hikayat Banjar. Ujar késah, sidin muncul dari buih di sungai. Imbah itu, sidin diangkat anak oleh Patih Lambung Mangkurat. Ratu pemulaan Negara Dipa ini kawin lawan Pangeran Suryanata matan Majapahit. Anak sidin beduaan tu Pangeran Aria Dewangga nang kawin lawan Puteri Kabu Waringin yaitu anak Lambung Mangkurat. Buhan sidin ni pang nang menurunakan raja-raja Kerajaan Negara Dipa, Kerajaan Negara Daha, sampay Kasultanan Banjar lawan Kasultanan Kotawaringin.

Menurut mitologi banyak tempat di Kalimantan, barang siapa nang handak jadi raja harus katurunan Puteri Junjung Buih. Makanya itu banyak raja-raja di Kalimantan nang mangaku katurunan sidin, kada raja-raja di Kalimantan Selatan aja. Ada kerajaan-kerajaan nang di Kalimantan Barat nang mangaku katurunan sidin jua.