Putri Huripan

Putri Huripan ialah parmaisuri Maharaja Suryaganggawangsa. Sidin anaknya Lambu Mangkurat lawan Danang Diparaja. Putri Huripan umanya Putri Kalarang wan Putri Kalungsu. Kuitan Putri Huripan ialah Aria Malingkun di Tangga Hulin atawa Huripan.

Kutipan Hikayat Banjar

Sudah itu hatta barapa lamnya kamudian daripada itu maka Danang Diparaja itu hamil. Sudah sambilan bulan balum baranak. Sapuluh bulan balum baranak. Sampai pada ampat belas bulan balum baranak. Sampai lima belas bulan maka hadap hadap parut, tiga hari tiga malam, balum budak itu kaluar. Barganti-ganti tatulak setan, barganti-ganti tabib, barganti-ganti urang kasarungan, barganti-ganti bidan, balum budak itu kaluar. Maka sakitlah hati Lambu Mangkurat itu, kalau anaknya itu mati. "Jika mati anaknya niscaya Raja Suryaganggawangsa itu tiada baristeri, kalau raja itu tiada bartinggal anak akan ganti raja itu," damikian fikirnya Lambu Mangkurat itu. Banyak tiada tarsebutkan. Maka barbunyi budak itu di dalam parut: "Hai bapaku Lambu Mangkurat itu, aku tiada mau kaluar daripada tampat nang najis itu; mau aku kaluar lamun higa ibuku dihiris subalah kiri, dibedahkan tampat aku kaluar itu." Didangarnya ulih Lambu Mangkurat ; sarta sagala urang nang dekat duduk sama mandangar itu. Maka kata Lambu Mangkurat: "Bagaimana bicara kita, hai Aria Magatsari dan Tumanggung Tatahjiwa, karana ia tiada mau kaluar pada tampat najis itu. Bicara ini saparti kata budak ini kita turutkan atau tiada?" Kata mereka itu: "Tiada hamba baroleh bicara ini. Dibedah isteri tuanku mati, tiada dibedah budak itu tiada mau kaluar, raja tiada baristeri. Itu hamba tuanku sukar mambicarakan, itu wastu bicara tuanku sendiri." Kata Lambu Mangkurat: "Baiklah aku balah higa muda isteriku. Jika ia itu mati, apa daya kita, asal jua hidup anaknya, karana itu sudah dipastikan isteri raja. Jikalau mati anaknya tiada kaluar, niscaya raja tiada mau baristeri. Kalau raja kita mati tiada bartinggal anak, niscaya kita tiada barpunya raja." Sudah itu maka dibalahnya higa isterinya nang kiri itu. Maka kata Danang Diparaja: "Hai tuanku Lambu Mangkurat, hamba mamohonkan ampun kalau ada salah hamba; dan hamba magirimkan anak hamba ini, baik-baik tuanku manyuruhkan mamaliharakan dia itu; dan hamba mamohon mati." Sarta manyambah lalu sujud pada Lambu Mangkurat Danang Diparaja itu, sarta mati. Kata Lambu Mangkurat: "Hai adikku nyawa, apa akan dayaku, karana aku tiada dua-dua bartuankan Maharaja Suryaganggawangsa itu, handak baristeri akan anak kita ini." Maka sagala hamba Lambu Mangkurat itu sama manangis. Maka budak di dalam parut itu kaluar, sarta rawingnya, sarta galangnya, sarta kanditnya, sarta capingnya, sarta kakarucungnya itu. Tubuhnya putih kuning, rambutnya mamanang hanibung, cahayanya saparti bulan purnama. Maka ia barkata: "Namaku ini Putri Huripan," Maka Danang Diparaja sudah dipatak saparti adat urang dahulu kala, sarta upacaranya saparti takhta astilah urang basar-basar itu. Banyak tiada tarsebut. Adapun Putri Huripan itu disaru akan urang barsusuan. Barganti-ganti itu disuruhkan Lambu Mangkurat manyusui Putri Huripan itu, tiga hari tiga malam masyghullah hatinya malihat Putri Huripan itu. Maka barkata Putri Huripan itu: "Tiada akau mau manyusu pada urang. Minta aku susukan karbau putih. Itu parahkan ambil airnya, itu aku minum." Demi didangar damikian kata Putri Huripan itu Lambu Mangkurat manyuruh mamarah susu karbau putih, itu diminumkan. Setelah itu maka Aria Malingkun dua laki isteri mandangar khabar anaknya itu mati damikian itu, kata Aria Malingkun dua laki isteri: "Hai adikku nyawa, anak kita sudah mati. Apa rupa kita, maski hidup manjadi gila berahi akan anak kita. Marilah kita sama-sama barbela." Kata isterinya: "Baiklah, kita barsama." Sudah itu Aria Malingkun manginang pinang muda, isterinya manginang pinang tua. Maka sepah kaduanya itu disuruhnya tanam pada hambanya. Pasan Aria Malingkun: "Sepahku ini pakai tatamba namanya jariangau akan ubat cucuku Putri Huripan itu." Kata isterinya: "Sepahku ini pakai tatamba dinamai pirawas akan ubat cucuku Putri Huripan itu." Sudah itu maka Aria Malingkun dua laki isteri itu barjalan ia kapada kabunnya, mati barbela. Sepah nang ditanam itu sama tumbuh. Itulah asal mulanya jariangau lawan pirawas itu di tanah Banjarmasin. Asal mulanya di Tangga Hulin, ia itu barnama Huripan sampai pada sakarang ini. Banyak tiada tarsebut. Maka Putri Huripan salamanya kacil dia diminumi air susu karbau putih. Itulah maka sagala asal daripada Putri Huripan itu pamali mamakan karbau putih. Banyak tiada tarsebut.