Wikipidia

Rambai

Rambai marupakan salah sabuting buah nang ada di hutanan Kalimantan, dalam bahasa Indunisia urang manyambatnya tatap mamakai ngaran buah Rambai, buah nang bangaran latin Baccaurea motleyana ini rasanya manis bacampur masam.[1]

Buah Rambai nang Bakindit

Buah Rambai tamasuk buah nang kalah saing lawan buah-buahan lain nang kaya Langsat, Mangga, Manggis, atawa Durian, marganya buah Rambai kada samanis kaya buah-buahan lain, lawan jua buah Rambai dianggap buah hutanan, imbahnya buah Rambai kada talalu banilai ekonomis bagi masyarakat.[2]

Morfologi

babak
 
Rapun Rambai nang Babuah

Amun diitihi panampakan luar batangnya, Batang rapun Rambai bamacam-macam bantuknya, ada nang babantuk sagitiga, ada nang babantuk satangah bulat, ada jua nang babantuk oblong atawa parsagi panjang. Balang kulit rapun Rambai bamacam-macam, ada nang babalang kuning, ada nang jingga bacampur habang, ada jua nang jingga bacampur habang tuha.[2]

Daun Rambai paling sadikit kawa kita pinandui matan dua macam putungan, ada nang putungannya oblong atawa sagi ampat panjang, ada jua nang putungannya melanset atawa intangan tangah daun talibar dari pada pangkal lawan hujungnya. Pangkal daunnya baisian putungan nang bamacam-macam jua, ada nang curing, tumpul, atawa babantuk nang kaya hati. Hujung daunnya ada pulang macam putungannya, ada nang parak curing, curing, lawan curing banar. Salihan pinggir daunnya ada nang barijing-rijing ada jua nang rata.[2]

 
Isi buah Rambai

Buah Rambai tumbuh barundun-rundun, warna kulit luar buah Rambai dipangaruhi tingkat kamasakan buahnya, ada nang bawarna putih, ada nang bawarna putih bacampur suklat, ada nang bawarna hijau, atawa bawarna suklat wara. Isi buah Rambai bahapat-hapat, dalam sabigi buah Rambai di dalamnya ada satu sampai tiga hapat bahkan ada jua nang sampai ampat hapat. Buah Rambai kawa tahan kada layu disimpan sampai tiga atawa ampat hari imbah diputik matan rapunnya.[2]

Habitat

babak

Panyabaran rapun Rambai sabujurnya luas, rapun Rambai kawa ditamuakan di Nagara India, Thailand, Semenanjung Malaysia, Filipina, sampai Kepulauan Pasifik. Amunnya di dalam nagri Rambai kawa ditamuakan di pulau Sumatera, Jawa, lawan Borneo.[3] Buah Rambai wayah ini kada talalu dikatahui banyak urang, tarutama bubuhan kakanakan. Habarnya rapun Rambai ditanam ulih Menteri Lingkungan Hidup dan Kehutanan Ibu Prof Dr Siti Nurbaya Bakar di dairah ibu kuta hanyar atawa IKN di Kalimantan Utara.[4]

Rambai sabujurnya bakaluarga lawan buah-buahan nang kaya Kapul lawan buah Jajantik. Ciri nang mambidaakan Rambai lawan dua janis buah tadi yaitu, buah Kapul basian kulit buah nang kandal, amun buah Jajantik ukurannya paling halus amun dibanding lawan Kapul atawa Rambai. Rapun Rambai kawa hidup di dairah baruh lawan sungai, Rambai tahan hidup di tanah nang tarandam banyu. Marga kundisi hidupnya nang di dairah banyu, parkambang biakan Rambai tajadi sacara alamiah mamanpaatakan aliran banyu sungai atawa baruh nang mambawa biginya larut.[5]

Kagunaan

babak

Rambai baisian banyak banar manpaat, biarpun tamasuk kadalam buah hutanan nang kada talalu dianggap baharaga, Rambai banyak diulah gasan ubat herbal, tumatan batang, daun sampai buahnya. Babarapa cuntuh manpaat buah Rambai misalnya, batang intangan dalam rapun Rambai kawa digunaakan gasan ubat panyakit mata bangkak, sadangkan kulit batangnya kawa digunaakan gasan ubat radang lawan kawa jua gasan palindung kulit manusia. [6]

Kulit buah Rambai mangandung alkaloid, fenolik, lawan flavonoid nang bapungsi gasan antioksidan, anti radang, antiinflamasi, lawan antimikroba. Pamanpaatan kulit buah Rambai salain gasan ubat herbal kawa jua gasan mangurangi ratik-ratik kulit buah Rambai nang tabuang.[7]

Daun Rambai kawa jua dimanpaatakan gasan ubat panyakit cacar, ubat bahiraan, lawan kawa jua maubati kulit nang luka bakas tapangkung. Alasan daun Rambai baisian manpaat nang kaya ini marganya ada zat-zat kandungan nang ada dalam daun Rambai baisi kamampuan mahambat hidup bakteri Escherichia Coli nang manyababakan panyakit di atas.[8]

Sari kulit buah Rambai diyakini kawa jua maubati payakit kancing manis atawa daiabetes,[9] tagal panggunaan sari kulit buah Rambai ini parlu panalitian nang lilip, salah sabuting nang parlu ditaliti manganai barapa dosis sari kulit buah Rambai nang pas lawan aman digunaakan manusia. Panalitian nang mamakai Tikus gasan uji cubanya manamuakan fakta bahwa amun kabanyakan dosis mamakai sari kulit Rambai kawa maulah hati rusak atawa urang manyambat nekrosis. Dosis nang aman digunaakan yaitu sabanyak 1600 mg/kg BB.[10]

Buah-buahan nang barasa masam biasanya mangandung vitamin C, buah Rampai damintu jua, dalam 100 gr buah Rambai mangandung 0,332 mg vitamin C.[1] Pangambangan manpaat buah Rambai di Kalimantan Selatan kawa kita itihi matan Desa Pagatan wayah pandemi covid-19 sumalam, masyarakat di dairah sana baulah sirup nang bahan bakunya matan buah Rambai. Sirup ini diyakini kawa manguatakan sistem imun di awak urang nang manginum, marganya sirup ini banyak mangandung vitamin A, B1 lawan C, pas banar amunnya dinginum wayah pandemi covid-19.[11] Di Kampung Sungai Rasau kacamatan Kurau kabupatin Tanah Laut, Rambai dijadiakan sirup jua ulih masyarakat, haraga sabutul sirup ukuran 200 ml 15 ribu rupiah. Walaupun balum talalu banyak nang baminat, tagal suah urang matan Jakarta manukari sirup Rambai ini, salihan sirup Rambai ulahan masyarakat Sungai Rasau ini sudah tadaptar di BPOM.[12]

Kulit buah Rambai sabujurnya kawa jua diulah gasan makanan, panalitian di masyarakat suku Dayak Banyadu Prupinsi Kalimantan Barat mamadahakan bahwa kulit Rambai kawa dimakan.[13]

Catatan Batis

babak
  1. ^ a b Salusu, Daud (2020-12-09). "Kandungan Vitamin C pada Tiga Jenis Buah-Buahan Genus Baccaurea". Buletin Loupe. 16 (02): 12–16. doi:10.51967/buletinloupe.v16i02.237. ISSN 2580-5274. 
  2. ^ a b c d Ramayani, Putri; Fitmawati (2020-04-30). "Diversity of rambai (Baccaurea motleyana (Müll.Arg.) Müll.Arg.) in Bengkalis Island based on morphological characters". Buletin Kebun Raya (dalam bahasa Inggris). 23 (1): 46–58. doi:10.14203/bkr.v23i1.5. ISSN 2460-1519. Diarsipkan dari versi asli tanggal 2023-03-01. Diakses tanggal 2023-03-01. 
  3. ^ Haegens, Raoul Martin Anne Peter (2000-01-01). "Taxonomy, Phylogeny, and Biogeography of Baccaurea, Distichirhops, and Nothobaccaurea (Euphorbiaceae)". Blumea. Supplement (dalam bahasa Inggris). 12 (1): 1–218. ISSN 0006-5196. 
  4. ^ redaksi (2022-10-10). "Rambai dari Ibu Menteri". MEDIA KALTIM (dalam bahasa Inggris). Diakses tanggal 2023-03-01. 
  5. ^ Saleh, Muhammad; Simatupang, Smith; Koesrini (2017). "TANAMAN BUAH EKSOTIK LAHAN RAWA" (dalam bahasa Indonesia). Diarsipkan dari versi asli tanggal 2023-03-01. Diakses tanggal 2023-03-01. 
  6. ^ Lim, Lim. Edible Medicinal And Non-Medicinal Plants (dalam bahasa Inggris). doi:10.1007/978-94-007-4053-2. 
  7. ^ Hutasuhut, Diza Afira; Aspriyanto, Didit; Krishnawan Firdaus, I Wayan Arya (2022-09-14). "UJI FITOKIMIA KUALITATIF DAN KUANTITATIF EKSTRAK KULIT BUAH RAMBAI (Baccaurea Motleyana) KONSENTRASI 100%". Dentin. 6 (2). doi:10.20527/dentin.v6i2.6394. ISSN 2614-0098. 
  8. ^ Fitriani, Tiya; Nashihah, Siti (2021-01-31). "UJI DAYA HAMBAT EKSTRAK ETANOL DAUN RAMBAI (Sonneratia Caseolaris (L) Engl) TERHADAP BAKTERI Propionibacterium acnes DAN Staphylococcus epidermidis". JFIOnline | Print ISSN 1412-1107 | e-ISSN 2355-696X. 13 (1): 40–53. doi:10.35617/jfionline.v13i1.65. ISSN 2355-696X. 
  9. ^ Sari, Widya; Safitri, Febria; Fauziah, Fauziah; Fithri, Aida; Masykur, Masykur; Amirsyah, Mirfandi; Ceriana, Ria (2018). "Potensi Antidiabetik Ekstrak Etanol Kulit Buah Rambai (Baccaurea motleyana Muell.Arg) terhadap Kandungan Glikogen Hati Mencit Diabetik Aloksan". Jurnal Bioleuser (dalam bahasa Indonesia). 2 (3). doi:10.24815/jobioleuser.v2i3.14964. ISSN 2597-6753. 
  10. ^ Ceriana, Ria; Putri, Nova Zarmi (2019-03-08). "Degenerasi Dan Nekrosis Pada Hati Mencit Diabetes yang Diberi Ekstrak Kulit Buah Rambai (Baccaurea motleyana Muell. Arg)". JOURNAL OF HEALTHCARE TECHNOLOGY AND MEDICINE. 4 (1): 103. doi:10.33143/jhtm.v4i1.172. ISSN 2615-109X. 
  11. ^ Ira Puspita Dewi, Nursalam (2021). "PENGOLAHAN BUAH RAMBAI Sonneratia caseolaris SEBAGAI MINUMAN PENGUAT IMUNITAS TUBUH DI MASA PANDEMI COVID-19". PRO SEJAHTERA (Prosiding Seminar Nasional Pengabdian kepada Masyarakat) (dalam bahasa Inggris). 3 (1). ISSN 2657-1579. Diarsipkan dari versi asli tanggal 2023-03-01. Diakses tanggal 2023-03-01. 
  12. ^ "BUMDes di Tanahlaut Olah Buah Rambai Jadi Sirup, Orang Jakarta Pernah Membeli". Banjarmasinpost.co.id (dalam bahasa Indonesia). Diakses tanggal 2023-03-04. 
  13. ^ Wibowo, Anggi; Rafdinal, Rafdinal; Ifadatin, Siti (2019-10-10). "Kajian Pemanfaatan Buah Edibel Suku Dayak Banyadu Di Hutan Tembawang Desa Setia Jaya Kecamatan Teriak Kabupaten Bengkayang". Jurnal Protobiont. 8 (3). doi:10.26418/protobiont.v8i3.36864. ISSN 2338-7874.  line feed character di |title= pada posisi 59 (bantuan)
Dijumput matan "https://bjn.wikipedia.org/w/index.php?title=Rambai&oldid=99878"