Rumah Adat Bali

Rumah adat Bali tu rumah adat nang ada di parupinsi Bali. Rumah adat nang bamulanya tumatan Bali. Rumah adat ngini baciri lain pada rumah adat nang lainnya nang ada di Indonesia. Bangunannya bahias karintilan kayu nang baukir-ukir. Mun diitihi, alami babanaran. Hiasan ngintu banyak makna atawa artinya. Bisa bamakna kabungasan, simbul-simbul, atawa ada nang handak dipapadahakan. Ada pamikiran sasuai lawan ajaran nang diyakini.

Apuah

Rumah adat Bali dingarani Rumah Gapura Candi Bentar. Rumah adat nang sauting ngini bisi ciri nang kadada sasamaannya lawan rumah adat nang lain saduniaan. Rumah adat Bali diulah baparaturan, baadat nang bangaran Asta Kosala Kosali. Paraturan ngini maatur banar gaya wan tataan paandakan macam-macam nang ada di rumah. mahirip lawan aturan nang ada dalam Feng Shui matan Cina.

Mun handak maulah rumah adat Bali tu, musti kada kawa kada maitihinang tiga parihal ni, paraturan hubungan nusia wan Tuhan; paraturan hubungan nusia wan sasama nusia; wan paraturan hubungan nusia wan alam samista. Katiganya ngini dingarani "Tri Hita Karana." Mun katiganya ngini dicapai bagus tipang.

Manurut kabiasaan nang diparcaya urang Bali, buncu utara wan buncu timur tu dipadahakan nang baapuah banar. Di buncu ngintu gasan diandaki ruang-ruang nang baapuah. Lamun buncu salatan wan barat tu dipadahakan tarandah sadikit apuahnya. Buncu ngini gasan kamar mandi kabiasaannya. Lamunnya ditiring manurut ilmu Bumi, panataan, mudil rumah adat Bali ngini sasuai babanaran wan iklim cuaca Indunisia. Mun rumahnya ngini diulah di dataran nang tatinggi, dinding rumah kada tapi tinggi, marganya supaya jangan tapi rancak angin kaluar masuk. lamunnya di dataran nang tarandah, dindingnya tabuka supaya tanyaman. Samunyaan disasuaiakan lawan kaadaan.

Bagian wan paidah

Rumah adat Bali dingarani Rumah Gapura Candi Bentar. Istilah Gapura Candi Bentar mangarah ka bangunan gapura nang jadi garbang rumah-rumah adat di Bali. Samunyaan bagian nang ada di rumah Bali ada kagunaan atawa paidahnya. Bagian wan kagunaan atawa paidahnya tu ngini pang:

1. Sanggah/pamerajan, ngini wadah nang baapuah gasan kaluwarga.
2. Panginjeng karang, ngini wadah gasan manyambah arwah nang manjaga pakarangan rumah.
3. Bale Manten, ngini wadah kaguringan kapala kaluarga, anak babinian, wan jua hagan manyimpan banda baharaga. Imbahanu jadi kaguringan pangantin hanyar.
4. Bale gede/bale adat, ngini gasan upacara kalangsungan hidup nang dalam sahari-hari jadi balai sarabakawa.
5. Bale Dauh, ngini wadah gasan bagawian, bakakumpulan urang banyak, wan kaguringan kakanak nang lalaki.
6. Paon atawa dapur, wadah gasan bamamasak wan jua gasan kindai (wadah manyimpan banih wan hasil kabun lainnya).