Sangkuang
Sangkuang atawa Sengkuang dalam bahasa Melayu atawa Dahu dalam bahasa Indunisia, baisian ngaran ilmiah Dracontomelon dao. Tumbuhan ini banyak digunaakan gasan kasihatan.[1] Sangkuang baisian ngaran nang balain-lain nang kaya di Irian Jaya (basuong), Sarawak (unkawang), Sabah (sarunsab), Papua Nugini (New Guinea Walnut), Filipina (dao), Thailand (ka-kho), Chiang Mai, (prachao ha phra ong).[2]
Morfologi babak
Akar Sangkuang tamasuk janis akar tunggang nang baubah manjadi akar babantuk kaya papan atawa banir, babalang habuk, akar Sangkuang nang baubah jadi banir tingginya sakitar 3 m. Batang Sangkuang babantuk bulat nang tumbuh cagat ka atas, cikangnya babantuk bulat nang panjang cikang pamulaan kawa sampai 20 m, babalang habuk atawa habu ruku.[1] Tinggi batang Sangkuang sakitar 44-55 m.[3]
Daun Sangkuang tamasuk janis daun manyirip ganjil, andakan daunnya basalisihan, bantuk daunnya mamanjang, pinggir daun rata, intangan atas daun licin mangkilap tagal intangan bawah daun rasang, daun Sangkuang babalang hijau tuha, pangkal daun dumul tagal hujungnya curing, panjangnya sakitar 8-15 cm libarnya 4-6 cm, intangan bawah daun imbahanu ditumbuhi bulu nang halus.[1]
Kambang Sangkuang babalang putih bacampur kuning, andaknya intangan katiak daun, mahkuta lawan kalupaknya kada kawa dibidaakan. Buah Sangkuang tamasuk buah sajati nang bajanis buah batu, kulit buahnya babalang hijau wayah anun tagal baubah babalang kuning wayah masak, parmukaan kulit buahnya rasang, isi buahnya babalang putih nang lambut, rasa buah Sangkuang masam tagal ada jua nang manis.[1]
Habitat babak
Sangkuang tumbuhnya tasabar di hutanan dataran randah. Rapun Sangkuang tahan hidup di tanah nang kundisinya baik sampai nang kundisinya ekstrim, tanah nang dikatujui Sangkuang tumbuh ialah tanah aluvial lawan dairah baruh. Sangkuang kawa jua tumbuh di tanah nang karing, di pinggir sungai, atawa tanah nang tarandam banyu.[1]
Manpaat babak
Sangkuang banyak dimanpaatakan masyarakat gasan ubat, bahan makanan lawan bahan bangunan.[1] Kulit batang Sangkuang kawa dimanpaatakan gasan maubati bahiraan, caranya lawan maambil kulit batang Sangkuang sabanyak 3-4 cm, imbah itu dijarang sampai manggurak, imbah sudah dingin campuri lawan madu hanyar diharu sampai rata. Nginumakan ka urang nang garing marga bahiraan.[1] Sangkuang mangandung alkaloid, flavonoid, tanin, steroid lawan triterpenoid. Tiga kandungan ini yaitu lavonoid, tanin, lawan steroid baguna gasan antidiare nang kawa maampihi bahiraan.[4] Daun Sangkuang nang diambil sarinya mahasilakan etanol nang bapungsi gasan larvasida atawa zat nang kawa mamati'i jantik-jantik nyamuk.[5] Salain kawa mamati'i jantik-jantik, etanol matan daun Sangkuang kawa jua mahambat laju pambanyakan jamur Candida albicans nang banyak ditamuakan di awak manusia.[6]
Catatan Batis babak
- ^ a b c d e f g Putri, Tania Dwi Yolanda; Dharmono, Dharmono; Utami, Nurul Hidayati (2022-03-01). "Kajian Etnobotani Tumbuhan Sengkuang (Dracontomelon dao) di Desa Sabuhur Kecamatan Jorong Kabupaten Tanah Laut Sebagai Buku Ilmiah Populer". JUPEIS : Jurnal Pendidikan dan Ilmu Sosial (dalam bahasa Inggris). 1 (2): 33–42. doi:10.55784/jupeis.Vol1.Iss2.36. ISSN 2809-7998.
- ^ Heung-Kyu., Moon, (2011). Tropical trees of Indonesia : a field guide to tropical trees. Korea Forest Research Institute. OCLC 774038957.
- ^ Mardiana, Mardiana; Dharmono, Dharmono; Sri, Amintarti (2015-10-17). "STRUKTUR POPULASI DAN POLA DISTRIBUSI TUMBUHAN SANGKUANG (Dracontomelon mangiferum BI.) DI DESA BATU TANGGA KECAMATAN BATANG ALAI TIMUR KABUPATEN HULU SUNGAI TENGAH".
- ^ Inderiyani, Inderiyani; Sulastri, Sulastri (2021-12-29). "UJI AKTIVITAS ANTIDIARE EKSTRAK ETANOL KULIT BATANG SENGKUANG Dracontomelon dao (Blanco) Merr & Rolfe TERHADAP MENCIT PUTIH (Mus musculus) JANTAN DENGAN METODE PROTEKSI DIARE". Jurnal Insan Farmasi Indonesia (dalam bahasa Indonesia). 4 (2): 195–204. doi:10.36387/jifi.v4i2.825. ISSN 2621-4032.
- ^ Kurniawan, Deny; Yuliawati, Ratna; Habibi, M.; Ramlan, Endah Ermaliah (2019-12-31). "Efektivitas Ekstrak Etanol Daun Sengkuang (Dracontomelon dao) Sebagai Larvasida Alami". Jurnal Penelitian Ekosistem Dipterokarpa (dalam bahasa Inggris). 5 (2): 79–86. doi:10.20886/jped.2019.5.2.79-86. ISSN 2460-5883.
- ^ Insana, Aima (2022-04-05). "Anti-Fungal Activity Test of Sengkuang (Dracontomelon dao) Leaf Ethanol Extract on The Growth of Candida albicans". Tropical Health and Medical Research (dalam bahasa Inggris). 4 (1): 36–43. doi:10.35916/thmr.v4i1.63. ISSN 2684-740X.