Sari Pangantin
Sari Pangantin adalah wadai tradisiunal nang asalnya tumatan suku Banjar di Kalimantan Selatan, tagal tadapat jua di dairah lainnya nangkaya di Kalimantan Timur. Wadai ngini mahirip wan wadai talam, tagal wadai Sari Pangantin ada tiga lapis bawarna-warni. Wadai ini diulah matan adunan galapung baras nang disumap.
Wadai Sari Pangantin rancak ditamui pas bulan puasa Ramadan, takjil gasan babuka puasa.[1] Tagal, wadai ngini jua rancak ditamui pas ada acara bakawinan.
Wadai Sari Pangantin wan wadai basah tradisiunal Banjar nang lain karancakannya disambat wadai cipir atawa wadai bakarat, lantaran wadai-wadai nitu dijual wan diandak dalam cipir atawa luyang ganal, imbah nitu dikarat-karat atawa dihiris sasuai kahandak nang manukar.[2]
Bahan gasan maulah wadai Sari Pangantin adalah galapung baras, gula, uyah, panili, wan banyu daun suji (pandan), pawarna kuning wan habang anum, lawan hintalu.
Wayah maulah wadai ngini, parlu dihatiakan pamakaian santan panas wan santan dingin dalam adunannya. Santan panas dimasuk akan ka dalam adunan imbah diharu sampai marata. Limbah nitu, hanyar santan dingin dimasuk akan.
Imbahnya campur akan hintalu ka dalam adunan, banyaknya hintalu gasan satu luyang harus 17 bigi. Hintalu ngini dimasuk akan ka dalam adunan pas masih warna kuning. Imbah tuntung dicampur, adunan kawa disumap bagantian.[3]
Jujuhutan
babak- ^ Redaksi (2008-09-23). "Berbuka dengan Sari Pengantin". Tempo.co. Diakses tanggal 2024-12-24.
- ^ Sanusi, Didi G (2019-05-12). "Tiap Hari Ludes 200 Loyang Wadai Bakarat Khas Banjar". Jejak Rekam. Diakses tanggal 2024-12-24.
- ^ Redaksi (2020-10-24). "Ini Resep Kue Sari Pengantin Khas Banjar, Kue Para Bangsawan". NKRIKU. Diakses tanggal 2024-12-20.