Supan-supan
Supan-supan (Neptunia oleraceae) dalam basa Indunisia dingarani Mimosa air, tamasuk sabuting tanaman sayuran khas dairah baruh Kalimantan Selatan. Tanaman ngini tamasuk tanaman liar nang kada dikabunakan, biasanya amun handak mandapatakan tanaman ini harus maambil langsung ka baruh atawa mancari ka pasar sayur tradisiunal.[1]
.jpg)
Supan-supan balain lawan putri malu nang rajin bagana di darat. Putri malu atawa Mimosa Pudica baasal matan genus Pudica, amunnya Supan-supan baasal matan genus Neptunia. Ciri lain nang mambidaakan kaduanya ialah habitat, Supan-supan hidup di dairah nang banyak banyu, amunnya Putri malu tahan tumbuh di dairah nang karing.[2]
Morfologi
babakTanaman Supan-supan baisian Aerenchyma atawa jaringan panghantar udara nang kaya spons putih, bagian ini nang maulah tanaman Supan-supan kawa mangapung di atas banyu. Aerenchyma ini kada ditamuakan amun Supan-supan tumbuh di pamatang. Panjang tanaman Supan-supan biasanya 6 inci, tagal akarnya tumbuh manyabar di dalam banyu nang panjangnya 3-5 kaki.[3]
Batang Supan-supan ditumbuhi daun nang takantup amun dijapai. Daunnya basusun bapasangan nang bahadap-hadapan, ukurannya halus-halus, dalam sabuting palapah daun ada sakitar 8-40 buting daun halus.[3]
Supan-supan baisian kambang halus nang bantuknya bulat babulu-bulu, babalang kuning kahijauan, malarak wayah musim panas. Buah Supan-supan babantuk kaya kacang polong pipih.[3]
Habitat
babakSupan-supan tumbuh di dairah baruh, di tanah nang tarandam banyu parak pahumaan. Wayah musim hujan atawa musim batanam banih, tumbuhan ini banyak banar ditamuakan di baruh nang tarandam banyu, tumbuh subur malayap di atas banyu. Tagal wayah musim kumarau atawa musim mangatam tanaman ini tatukup halalang lawan kumpai di sakitar baruh atawa pahumaan, ayungannya supan-supan ngalih ditamuakan, amun ditamuakan jua kundisinya karing lawan layu.[1]
Manpaat
babakSupan-supan salain kawa dijadiakan sayur, kawa jua dijadiakan ubat tradisiunal. Supan-supan banyak mangandung bioaktif nang kawa mangurangi radikal bibas di awak manusia. Daun Supan-supan kawa jua maampihakan panyakit diabetes atawa kancing manis, marga mangandung enzim hidrolase nang kawa mamacah karbohidrat manjadi gula sadarhana.[1]
Supan-supan nang banyak ditamuakan di baruh kawa jua dimanpaatakan gasan media tanam banih tarapung. Caranya tanaman Supan-supan digulung sampai tabalnya sakitar 30 cm, ditambahi tanaman kayapu di lapisan kadua, lawan diandaki paring supaya kada bagisir. Imbah media apung sudah jadi, stirofoam nang baisi tanah digunaakan gasan media tanam bibit banih, nang salanjutnya diandak di atas Supan-supan tarapung tadi.[4]
Tanaman Supan-supan kawa jua dimanpaatakan gasan mambaiki ekosistem nang rusak marga tarcamar unsur logam barat nang kaya alumunium.[5] Salain unsur Alumunium, Supan-supan kawa jua baadaptasi di lingkungan nang tarcamar merkuri. Manurut hasil panalitian, Supan-supan nang tumbuh di lingkungan tarcamar merkuri mangalami panurunan kamampuan fotosintesis marga daun nang sasain bahalus lawan bakurang.[6]
Catatan Batis
babak- ^ a b c Mubarok, Shafrian; Susanti, Hilda; Rusmayadi, Gusti (2018-10-06). "Karakteristik lingkungan tumbuh dan hasil supan-supan (Neptunia oleraceae) di beberapa rawa Kabupaten Banjar". PROSIDING SEMINAR NASIONAL LINGKUNGAN LAHAN BASAH. 3 (2). ISSN 2623-1980.
- ^ "Tanaman Malu". Dinas Ketahanan Pangan dan Pertanian Ngawi (dalam bahasa Inggris). Diarsipkan dari versi asli tanggal 2023-03-15. Diakses tanggal 2023-03-15.
- ^ a b c "Putri Malu Bunga Kuning, Neptunia oleraceae - PLANTER AND FORESTER". www.planterandforester.com. Diakses tanggal 2023-03-15.
- ^ "Tingkatkan Pertanian dengan Inovasi Padi Apung". Kalimantan Post (dalam bahasa Indonesia). 2022-12-02. Diakses tanggal 2023-03-15.
- ^ Mutiara Nugie Septiani, Mukarlina (2017-07-14). "Pertumbuhan dan Karakter Anatomi Mimosa Air (Neptunia oleracea Lour.) pada Air yang Terpapar Logam Aluminium (Al)". Jurnal Protobiont (dalam bahasa Inggris). 6 (2). doi:10.26418/protobiont.v6i2.20816. ISSN 2338-7874.
- ^ Fadhlullah, Hafizh Rizqi; Wardoyo, Elvi Rusmiyanto Pancaning; Zakiah, Zulfa (2021-06-23). "RESPON MORFOLOGI, BIOMASSA, DAN KANDUNGAN KLOROFIL DAUN MIMOSA AIR (Neptunia oleracea L.) PADA AIR YANG TERPAPAR MERKURI KLORIDA (HgCl2)". Jurnal Protobiont (dalam bahasa Inggris). 9 (3). doi:10.26418/protobiont.v9i3.47574. ISSN 2338-7874.