Tigarun
Tigarun (Crataeva Nurvala/Crataeva Adansonii) adalah tanaman trupis bakayu sajanis puhun nang tamasuk dalam kaluarga tanaman Capparaceae. Tanaman ngini tumbuh tawantar di Banua Asia lantaran iklim trupis nang cucuk gasan tanaman tumbuh. Tigarun rancak ditamui di hutan gahung atawa pinggir sungai. Tigarun jua baisi ngaran lain nangkaya; Garlic Pear, Templeplant, Three-leaved Caper (Inggris), Tonliem (Kamboja), Yu Mu, Yiu Tu Chih (Tiongkok), Banugan, Salingbobog (Filipina), Gyo-boku (Japang), Varuna (India). Dalam Bahasa Indunisia, banyak nang mengarani tanaman ngini sesuai lawan wadah tumbuhnya, misalnya ada nang menyambat Tanaman Sempal Wadak, Barunday, Sibaluak, Tigaron.[1]
.jpg)
Tigarun baisi sajarah pengaranan nang dibawa dari Jawa, asal muasalnya ujar dari Bahasa Jawa (halus); tlu artinya tiga ron artinya daun. Tasambat jua dalam Prasasti Tlu Ron nang ada di Yogyakarta. Jadinya urang menyambat Tigaron (Tiga Daun), tanaman ngini badaun majemuk; setangkai tadapat talu halai daun. Hal ngini turut menjelasakan kanapa tanaman ngitu dingarani Tigarun.[2]
Morfologi
babak.jpg)
Tigarun temasuk dalam tumbuhan bakayu. Batangnya tumbuh lurus mambujur keatas, cakingnya liwar banyak tagal tumbuh kada menentu arah. Tinggi puhun bisa mancapai 3-15 m. Batang puhunnya bediameter kurang labih 40 cm.[3]
Daun
babakDaun Tigarun ukurannya halus, basusun sulang sali, tumbuh majemuk wan manjari talu. Panjang daunnya 5-10 cm wan libar daun 2.5-5 cm. Bantuk daunnya manyirip, urat daun manjala. Kalirnya hijau anum di bahagian atas, lamun di bawahnya hijau dauk.[4]
Buah
babakTigarun baisi buah nang disambat buah tilanjang atawa buah sejati, buahnya bedaging temasuk dalam buah buni. Misalnya buah Tigarun ini beganal lawan mulai masak, daun puhun Tigarun beguguran sorang sampai habis kedida daun lagi. Banyak urang mengira puhun Tigarun ngini mati, aslinya pehadangan musim buah haja wan sifat puhunnya nang maranggas pabila musim. Lamun masih anum, kalir buahnya hijau babarcak putih. Amunnya sudah tuha kalir buahnya beubah sorang jadi cuklat.[3]
Kambang
babakKambang Tigarun bisi struktur nang kumplit, kelopaknya putih disakulilingnya ada benang sari nang becurai. Kambang Tigarun bakalamin bancir, bisa lakian bisa jua binian, tagal tumbuh di asa rumah. Kambangnya manyaruak matan di hujung cakang cangkingnya, tagal tangking kambangnya kedida becaking.[3]
Akar
babakAkar Tigarun marupakan akar tunggang wan banir nang disusun nangkaya papan disusun behereng gasan menguatakan akar puhun.[3]
Ulahan
babakTigarun diambil kambangnya gasan diulah manjadi Jaruk Tigarun. Jaruk adalah proses fermentasi nang batujuan hagan meawetkan makanan, proses manjaruk maulah makanan bisa tahan hagan seminggu sampai sebulan labih akibat bantuan ulih bakteri nang muncul pas proses pembusukan. Proses manjaruk maamban bakteri Lactobacillus Plantarum nang maulah kadar fenolik wan aktipitas antioksidan maningkat dalam Jaruk Tigarun.[5]
Bagi urang Banjar, Jaruk Tigarun bisa rasa nang khas; sedikit pahit wan masam tagal sigar. Proses manjaruk Tigarun dimulai dari manjumput daun wan kambangnya sakaligus lalu dirandam dalam banyu manggurak kurang labih 3 minit. Proses merandam ini dilakukan gasan mehilangkan bau mahung wan gatah nang ada pada tanaman. Misalnya sudah tuntung dibasuh, kambang wan daun tadi lanjut dirandam dalam banyu hangat nang sudah ditambahi uyah. Limbah 3 harian, banyu randaman mulai bekalir habang anum. Jaruk Tigarun siap dimakan basamaan lawan nasi panas wan iwak karing sesuai salira masing-masing.[6]
Jaruk Tigarun kada kawa dimakan satiap hari, kambangnya tumbuh menyesuaikan lawan jadual 'pembungaan' setahun sekali sekitaran Bulan Pebruari-Maret. Lamun lalu daripada bulan ngitu, puhun Tigarun meranggas nang rancak dikira urang puhunnya mati[3]
Manapaat
babakTigarun ni banyak klaim manapaat gasan tatamba tradisional. Tanaman Tigarun baisi kandungan diuretik, antiradang, pencahar, antioksidan nang bisa membantu penambaan penyakit ginjal wan saluran pencernaan. Selain ngitu, ekstrak daun Tigarun jua kawa dipakai gasan mangurangi tekanan darah tinggi awan maningkatakan fungsi hati.[7]
Biasanya banyu dijarang lawan daun atawa kambang tigarun gasan tatamba garing panas atawa kalalah gasan binian nang habis baranak dalam kabudayaan Banjar. Sacara kailmuan medis, beluman ada bukti nang manunjang akan klaim tatambaan dan manapaat Tigarun tersebut. Salain gasan tetambaan, Tigarun ditanam ulih masyarakat karana daun nang rimbun nang kawa diulah jadi wadah betaduh dari panas matahari.[7]
Referensi
babak- ^ Mazza, Giuseppe (2016-06-27). "Crateva religiosa". Monaco Nature Encyclopedia (dalam bahasa Inggris). Diakses tanggal 2023-03-06.
- ^ "Pohon Tlu Ron, Jejak Kuno Nama Lokasi Candi Kedulan, Tumbuh Subur di Banjarmasin - Tribunjogja.com". jogja.tribunnews.com. Diakses tanggal 2023-03-04.
- ^ a b c d e Soendjoto, Mochamad Arief; Riefani, Maulana Khalid (July 2014). "Tigaron (Crataeva adansonii) Tumbuhan Lahan Basah, Bahan Jaruk Tigaron". Warta Konservasi Lahan Basah. Volume 22: 16 – via ResearchGate.
- ^ Mazza, Giuseppe (2016-06-27). "Crateva religiosa". Monaco Nature Encyclopedia (dalam bahasa Inggris). Diakses tanggal 2023-03-04.
- ^ Rahmi, Narzani; Harmayani, Eni; Santosa, Umar; Darmadji, Purnama (2016-08-21). "Identifikasi Bakteri Asam Laktat dan Aktivitas Penghambatan Radikal pada Jaruk Tigarun (Crataeva nurvala, Buch Ham)". agriTECH (dalam bahasa Inggris). 36 (3): 317–326. doi:10.22146/agritech.16604. ISSN 2527-3825.
- ^ Erna (2019-03-24). "Jaruk Tigarun, Lalapan Ala Urang Banjar Yang Semakin Langka". Duta TV | Berita Terkini Kalimantan Selatan (dalam bahasa Indonesia). Diakses tanggal 2023-03-06.
- ^ a b Musyahadah, Nur (September 2015). "UJI EFEKTIFITAS EKSTRAK DAUN TIGARON (Crateva religiosa G. Forst.) TERHADAP MORTALITAS ULAT GRAYAK (Spodoptera litura F.) (Lepidoptera: Noctuidae) DI LABORATORIUM" (PDF). Prosiding Seminar Sains dan Teknologi FMIPA Unmul. Vol. 1 No. 1: 3 – via FMIPA UNMUL. line feed character di
|title=pada posisi 59 (bantuan)