Zainal Ilmi al-Banjari
Guru Haji Zainal Ilmi atawa nang rancak disambat Tuan Guru Zainal Ilmi Al-Banjari adalah saurang ulama Kalimantan Selatan. Inya ranakakan pas hari Jumahat sakitar satangah lima baisukan, 7 Rabiul Awwal 1304 H di Kampung Dalam Pagar, Martapura Timur, Banjar. Inya tamasuk turunan Syekh Muhammad Arsyad al-Banjari maraga abahnya nang bangaran Abdus Shamad bin Muhammad Said Wali, adalah turunan kaampat Syekh Muhammad Arsyad al-Banjari atawa Datu Kalampayan. Sadangkan umanya bangaran Hajjah Qamariyyah.[1]
Pandidikan babak
Zainal Ilmi rahatan masih halus sudah dapat bimbingan ilmu Islam matan kulawarganya. Mulai lagi halus jua inya rajin baibadah wan baisi parangai nang baik wan manjauhakan diri matan hal-hal nang subhat.
Adapun Guru Zainal Ilmi al-Banjari dalam manuntut ilmunya, di antaranya adalah lawan abah sidin saurang pasal ilmu arabiyyah, fikih, wan hadis kira-kira 6 tahun. Imbahnya inya balajar lawan Guru Haji Muhammad Amin bin Qadhi Haji Mahmud, Syekh Abdurrahman Muda, Guru Haji Abbas bin Mufti Haji Abdul Jalil, Guru Haji Abdullah bin Guru Haji Muhammad Shaleh, Guru Haji Muhammad Ali bin Abdullah Al Banjari, Guru Haji Khalid, Guru Haji Ahmad Nawawi, Guru Haj Ismail Dalam Pagar Martapura, Guru Haji Ahmad Bahruddin Wali Kuin Banjarmasin, wan lainnya.[2]
Karomah babak
Di antara karomah Guru Zainal Ilmi nang paling tarkanal ialah mamajahakan api matan jauh wan jua inya tarkanal sabagai urang nang kasyap.[3]
Wafat babak
Guru Zainal Ilmi maninggal di Karang Intan kada sawat lawas imbah inya tuntung bacaramah. Inya meninggal pas hari Jumahat tanggal 13 Dzulqaidah 1375 Hijriah atawa 21 Juni 1956 Masihi jam 12 siang. Waktu hari Sabtu, 14 Dzulqaidah Tahun 1375 Hjiriah, inya dikuburakan di higa makam abahnya, Guru Haji Abdus Shamad di Kalampayan, wan datunya, Datu Kalampayan.[4]
Jujuhutan babak
- ^ Tuan Guru Zainal Ilmi Al-Banjari, rifafreedom.wordpress.com. Diakses 5 Agustus 2019
- ^ DIA, Yayasan (2022-06-17). "Biografi KH. Zainal Ilmi Al-Banjari". Biografi KH. Zainal Ilmi Al-Banjari (dalam bahasa Inggris). Diakses tanggal 2023-12-02.
- ^ "Karomah Guru Zainal Ilmi Martapura, Mampu Memadamkan Api Dari Jarak Jauh". Berita Banjarmasin | Situs Berita Data & Referensi Warga Banjarmasin. Diakses tanggal 2023-12-02.
- ^ DIA, Yayasan (2022-06-17). "Biografi KH. Zainal Ilmi Al-Banjari". Biografi KH. Zainal Ilmi Al-Banjari (dalam bahasa Inggris). Diakses tanggal 2023-12-02.