Antropologi fisik

Antropologi fisik marupakan cikang matan ilmu antropologi nang fokus mampalajari manusia sawagai makhluk biologis. Dalam ilmu ngini, manusia diaanyaki matan buncu jasmaninya lawan lingkup nang taligar, nang kaya asal-usul, parkambangan evolusi organik, struktur awak, wan ras. Malalui aktivitas analisis nang mandalam ka fosil-fosil wan panjanakan ka primata-primata nang suah hidup, bubuhan nang harat ilmu antropologi fisik baihtiar malacak nini panuhanya jenis manusia gasan mangatahui kayapa, pabila, wan napa kita jadi makluk nang kaya wahini.^[1]

Antropologi fisik mambuat bamacam manusia ka strukturnya atawa homologi ka dalam kalas mamalia, orde primata, kulawarga homonidae, genus homo, wan spesies sapiens. Spesies sapiaens tapacah ka dalam kalumpuk-kalumpuk ras. Maraga ngitu, ras marupakan konsepsi biulugi, lain konsepsi sosio kebudayaan.^[1]

Antropologi fisik jua fokus maanyaki pangaruh lingkungan ka danul awak manusia, maraga manusia hidup di tiga lingkungan, alam, susial, wan transenden. Mata katiga lingkungan ngitu, lingkungan alamiah nang barkambang jadi wadah hidup manusia. Ngini bamakna, ada raraitan antara alam lawan bantuk fisik manusia. Hal ngini imbahnya kawa dipakai gasan manjalasakan hal nang kaya balainnya luang hidung antara ras lawan nang lain maraga bedanya derajat wan kalambapan angin wan temperatur di lain dairah di muka bumi.^[1]

Diitihi matan buncu paanyakannya, antropologi fisik tabagi jadi cikang-cikang ilmu nang tahalus, nang kaya:

Evolusi manusia, yaitu ilmu nang maanyaki paubahan badirit hiwal barkambangnya macam manusia nang pamulaannya matan makluk nang lain manusia.
Paleontologi primata, ilmu nang maanyaki gambaran macam manusia nang wahini hudah punah wan makhluk lain nang masih rikit raraitannya lawan manusia.
Somatologi, ilmu nang maanyaki manusia nang magun hidup sarta parbidaan seks wan variasi urang.
Antropometri, ilmu nang maanyaki cara maukur awak manusia gasan mambidaakan struktur danul awak antara ras lawan ras nang lain.
Antropologi rasial, ilmu nang maanyaki hiwal tabuatnya manusia ka dalam kalumpuk ras, sajarah ras, wan pangambuhan ras.^[1]

Jujuhutan

^ ^a ^b ^c ^d Diandra, Dessy (2021). Pengantar Antropologi Sebuah Ikhtisar Mempelajari Manusia dan Kehidupannya. Yogyakarta: DIVA Press. hlm. 12–13. ISBN 978-623-293-290-6.

[:0-1] Diandra, Dessy (2021). Pengantar Antropologi Sebuah Ikhtisar Mempelajari Manusia dan Kehidupannya. Yogyakarta: DIVA Press. hlm. 12–13. ISBN 978-623-293-290-6.

[1]