Antropologi

Antropologi marupakan ilmu nang mampalajari hiwal manusia matan danul nang bamacam. Antropologi surang baasal matan duwa kata anthropos dan logos, anthropos baarti urang atawa manusia sadangkan logos baarti ilmu, jadi lamun katanya dikambuh bamakna ilmu pengetahuan hiwal manusia. Dalam Basa Inggris antropologi ditulis anthropology nang diaartiakan sawagai sabuting ilmu nang baihtiar mancapai arti hiwal makhluk manusia lawan mampalajari macam kalir, bantuk fisik, kapribadian, masarakat wan budayanya.

Dalam arti nang ludang, antropologi kawa disambat sawagai ilmu pangatahuan nang mancuba manalaah sifat-sifat manusia sacara umum wan maandak manusia nang unik dalam sabuting lingkungan hidup nang labih bamartabat. Dalam antropologi, manusia dijanaki sawagai makluk nang musakat baik matan fisiknya, emosinya, susialnya, atawa budayanya. Antropologi rancak jua disambat sawagai ilmu hiwal manusia wan budayanya.

Pengertian manurut ahli

Kottak, dalam bukunya nang bajudul Antrophology; The Exploration of Human Diversity (1991), manyambat bahwa antropologi marupakan ilmu nang ligar, kada nang kaya cara janak urang umum nang lain nang nyambat antropologi sawagai ilmu nang mangkaji masarakat nonindustri. Kottak jua manyambat, antropologi ngitu marupakan ilmu maampah ka samunyaan masarakat matan masarakat nang primitif sampai nang mudirn, wan matan masarakat sadarhana sampai masarakat musakat. Dalam panjanakannya jua, antropologi jua marupakan studi lintas budaya nang mambandingakan kabudayaan sabuting masarakat lawan kabudayaan masarakat nang lain.

Harsojo dalam bukunya bajudul Pengantar Antropologi (1984) manyambat antropologi marupakan ilmu pangatahuan nang mampalajari umat manusia sawagai makluk masarakat. Parhatian antropologi, manurut panjanakkannya, maampah ka sifat khusus awak wan cara produksi, tradisi, sarta nilai-nilai nang pacangan malainakan cara pargaulan hidup nang satu lawan pargaulan hidup nang lainnya.

Koentjaningrat dalam bukunya bajudul Pengantar Antropologi I (1996) manjalasakan pangartian antropologi matan dua buncu panjanakan, yaitu sacara akademis wan sacara praktis. Antropologi dalam makna akademis marupakan sabuting ilmu hiwal manusia nang umum, lawan titik pukus kajian lawan bantuk fisik, masarakat, wan budaya manusia. Lamun dalam makna praktis, antropologi marupakan sabuting ilmu nang mampalajari manusia dalam bamacam masarakat suku bangsa guna maulah masarakat suku bangsa ngitu. Di wayah nang lain di dalam buku Pengantar Ilmu Antropologi (1999), inya manyambat antropologi marupakan ilmu nang mampalajari hiwal manusia sawagai makhluk biulugi wan manusia sawagai makhluk sosio-budaya sacara nahap, yaitu kasatuan bio-sosio-budaya.

Masinambow (1997) manyambat antropologi marupakan ilmu nang mangkaji masarakat atawa kalumpuk manusia. Haviland (1999) jua manyambat antropologi ngitu ilmu nang mandirit sajumlah generalisasi nang bamakna hiwal makhluk manusia wan gawiannya sarta pangartian nang purna hiwal bamacam manusia, baik budaya atawa caciri awaknya.

Keesing (1999) maartiakan antropologi ngitu sawagai ilmu nang mamandirakan hiwal bamacam budaya, parbidaan wan parsamaan fisik, sarta sipat manusia wan kalambanggannya.

Sajarah

Antropologi mulai dipinandui urang sawagai ilmu imbah tuntungnya International Symposium on Anthropology pas tahun 1951. Labih 60 ahli antropologi matan nagara-nagara di andakan Ero-Amerika mantuti acara ngini nang maulah lambar hanyar hagan antropologi nang dicirii lawan dinaikakannya babarapa kulihan karya antropologi matan bubuhan ahli. Imbah acara ngini jua antropologi mulai bakambang di bamacam nagara lawan bamacam tujuan pamakaiannya.

Ruang lingkup Antropologi

Lamun malihat pangartian antropologi sawagai ilmu hiwal manusia, maka antropologi batikas banyak ilmu nang kaya sosiologi, psikologi, ilmu pulitik, ilmu ikunumi, ilmu sajarah, biulugi manusia bahkan humaniura, filsafat, wan sastra, nang samunyaan mampalajari atawa bakaitan lawan manusia.

Manurut Alfred Kroeber, urang nang ahli antropologi Amirika Sarikat, ruang lingkup antropologi liwar libar, maraga maliputi manusia sawagai makhluk fisik, manusia dalam wayah prasajarah, wan manusia dalam sistim budayanya sawagai warisan suatu sistem nang musakat maliputi adat istiadat, sikap, wan kalakuan.

Nurmansyah, wkk (2019) manyambat salah sabuting ciri nang pambanyaknya dapat parhatian dalam antropologi adalah raraitan antara budaya wan caciri biulugis manusia. Wayah katargantungan manusia ka paangkutan jalan batis, ukuran utak nang ganal, sarta kabisaan mamakai simbul-simbul adalah babarapa cuntuh ciri biulugis nang pinanya manusia ulah wan dapat budaya.

Ruang lingkup antropologi kawa dimasukakan ka dua danul nang ganal, yaitu antropologi fisik wan antropologi budaya.

Antropologi fisik

Artikal utama: Antropologi Fisik

Antropologi Fisik marupakan ilmu nang pukus ka kajian manusia sawagai makhluk biulugis. Dalam antropologi fisik, manusia dinahapi matan buncu jasmaninya lawan lingkup nang taligar, nang kaya asal-usul, parkambangan evolusi organik,struktur awak, wan ras.

Antropologi Budaya

Artikal utama: Antropologi Budaya

Antropologi budaya marupakan cikang utama dalam antropologi nang manjanaki budaya pada umumnya wan bamacam budaya di dunia. Antropologi budaya baihtiar mamahami kayapa manusia kawa baisi budaya wan mangambangakan budayanya.

Raraitan Antropologi lawan ilmu nang lain

Antropologi marupakan ilmu nang malibatakan banyak ilmu nang lainnya nang batujuan mampalajari manusia banahap. Maraga ngini, ada raraitan bulang bulik ilmu antropologi wan ilmu-ilmu nang lain, kususnya ilmu susial wan humaniora nang manjadiakan masarakat manusia sawagai ampah kajiannya.

Raraitan Antropologi lawan kaji masarakat

Antropologi wan kaji masarakat liwar parak. Hiwal ngini maulah urang kangalihan malainakan, maraga kadua ilmu ngini manjadiakan manusia sawagai ampah kajiannya. Tagal, lamun dijanaki banahap, pacangan talihat parbidaan antara kaduanya.

Panambayan, kadua ilmu baisi asal-usul dan sajarah parkambangan nang balain. Antropologi ranak wan bamula matan catatan tulaknya buhan musafit ka banua salihan Irupa gasan manulisakan lapuran hiwal kaunikan suku bangsa nang disinggahi. Pahadangan, kaji masarakat bamula matan filsafat nang imbahnya dikambangakan jadi filsafat susial. Tagal, filsafat susial nang dipakai gasan mangkaji masarakat Irupa haratan revolusi industri, kada kawa maatasi piduhal antara ampun mudal wan kaum nang bagawi, sahingga mamarluakan cikang ilmu filsafat susial hanyar nang imbahnya maranakakan kaji masarakat.

Kaduwa, ilmu antropologi wan kaji masarakat baisi objek formal atawa bahan paayakan nang balain. Antropologi mampukusakan kajian ka masarakat sarta kabudayaan masarakat desa wan primitif di luar bangsa Irupa. Pahadangan, kaji masarakat mampukusakan kajian ka masarakat Irupa-Amirika.

Katiga, metodologi nang dipakai kadua ilmu balain. Antropologi mamakai pamarakan kualitatif nang bagantung ka panjanakan wan wawancara. Pahadangan, kaji masarakat mamakai pamarakan kuantitatif nang bagantung ka survei.

Raraitan Antropologi lawan Ilmu Sajarah

Ilmu sajarah marupakan ilmu panulung nang liwar panting gasan antropologi, tautam lawan raraitannya lawan sajarah pamulaan sarta bakambangnya suku bangsa nang dijadiakan ampah kajian. Pula pamarakan nang dipakai antropologi basipat sabukuan lawan mahatiakan samunyaan danul kahidupan manusia dalam masarakat. Barbagai piduhal dalam ilmu sajarah kawa dituntungakan lawan mamakai cara antropologi. Sabarataan naskah paninggalan batulis, prasasti, wan dukumin-dukumin tuha kawa dipahami wara lamun hudah dipalajari latar balakang masarakat wan kuntiks budayanya. Kunsip-kunsip hiwal kahidupan masarakat nang bakambang ulih antropologi kawa manulungi bubuhan nang harat sajarah gasan mandapatakan suatu pangartian hiwal latar balakang suatu paristiwa sajarah tartantu di wayah bahari.

Raraitan Antropologi lawan kaji awak

Antropologi mamarluakan ilmu kaji awak gasan mamahami caciri wan palainan fisik manusia, tautama palainan ras, bantuk rambut, wan kalir awak gasan mamahami raraitan antara ras/kalumpuk manusia satu lawan ras/kalumpuk manusia lawan ras/kalumpuk manusia nang lain, sarta bakas tarjadinya palainan ciri fisik wan ras manusia ngitu. Ilmu kaji awak diparluakan ulih antropologi gasan ihtiar mandapatakan habar asal pamulaan wan pambantaran manusia sarta rarataitan antara ras-ras di dunia, malalui kajian paanyakan hiwal caciri barbagai tangkurak, wan danul awak manusia pada umumnya.

Raraitan Antropologi lawan kaji bumi

Ilmu kaji bumi (Geologi) marupakan ilmu nang mangkaji caciri lapisan bumi sarta paubahan-paubahannya. Ilmu ngini dpakai ulih antropologi maraga nang barait lawan tamuan fosil-fosil, bakas-bakas karangka manusia wan artifak, atawa banda-banda kulihan karya manusia nang tagana di bawah tanah salawas ratusan atawa ribuan tahun nang tadahulu. Paanyaakan lawan cara ilmu kaji bumi lawan cara mitudilugi tartantu diharapakan kawa maungkai wayah nang dilalui ulih fosil-fosil atawa artifak nang ngitu tadi, sahingga kawa dipakai ulih antropologi gasan mambangun wan manjalasakan cacari fisik manusia, sarta parkambangan masarakat wan kabudayaan nang barlaku haratan wayah ngitu.