Baayun Mulud
Baayun Mulud adalah kagiatan maayun bayi atawa kakanakan sambil mawaca sair mulud.[1] Baayun mulud digawi gasan marayaakan Maulid Nabi Muhammad SAW saban tanggal 12 Rabiulawal.[1] Taradisi ngini digawi ulih masarakat Banjar, Kalimantan Salatan.[2] Kata "Baayun" artinya ayunan atawa buaian, sadangakan kata mulud dibibit matan basa Arab nang artinya ungkapan masarakat Arab gasan karanakan Nabi Muhammad SAW.[2] Lawan damintu, Baayun Mulud artinya kagiatan maayun anak (bayi) sawagai bantuk rasa sukur atas karanakan Nabi Muhammad SAW.[2]
Manggawi
babak
Tujuan daripada gawian ngini adalah kakanakan Banjar amun sudah ganal kainah maumpati ketauladanan Nabi Muhammad SAW wan maasi lawan kuitan.[3] Gawian ngini karancakannya digawi di masigit.[1] Alat wan bahan nang diparluakan dalam Baayun Mulud adalah ayunan nang diulah matan tapih bahalai nang hujungnya dijarat lawan tali gasan dikaitakan ka atas supaya kawa diayun.[3] Kain ayunan diulah talu lapis.[3] Lapisan paling atas adalah kain sarigading atawa sasirangan.[3] Ayunan dihias lawan janur pohon nipah atawa pohon enau wan pohon kelapa nang diulah bamacam bantuk kaya halilipan, katupat, kambang sarai, atawa kambang nang lain. Bahandar jua buah pisang, kue cucu, kue cincin, wan hiasan lainnya.[3] Baayun mulud baisi syarat piduduk.[3] Piduduk terdiri dari 3,5 litar beras, 1 gula habang, uyah gasan anak lakian dan sadikit uyah ditambah minyak goreng gasan anak binian.[3]
Acara nang iyanya yakni mambaca syair Mulud matan tuan guru, tasarah matan Barzanji, Habsyi, Diba', atawa Qasidah Burdah sambil batarabang. Sama kaya Mulud rajin, wayah "Asyraqal" sabarataan badiri sambil mambuat kakanakan ka dalam ayunan.[4]
Jujuhutan
babak- ^ a b c "Baayun, Tradisi Masyarakat Banjar". 26 Mei 2014.21.00. Diarsipkan dari versi asli tanggal 2014-05-27. Diakses tanggal 2014-05-26.
- ^ a b c "Baayun Mulud:Tradisi Khas Banjar Merayakan Maulid Nabi". republika.co.id. Diarsipkan dari versi asli tanggal 2021-10-20. Diakses tanggal 26 Mei 2014.21.15.
- ^ a b c d e f g "Baayun Maulid, Tradisi Unik Masyarakat Banjar". itoday.co.id. Diarsipkan dari versi asli tanggal 2014-05-27. Diakses tanggal 26 Juni 2014.21.48.
- ^ Antemas, Anggraini. Mengenal Flora, Fauna dan Seni Budaya Banjar: Bahan Muatan Lokal Untuk Sekolah Dasar. Jilid I. Ananda Nusantara. hlm. 41.