Cendana adalah tanaman nang mahasilakan kayu atawa minyak cendana, nang mana tanaman ngini tamasuk kalumpuk famili Santalaceae. Di Indunisia, tanaman ngini tumbuh di Parupinsi Nusa Tenggara Timur, yaitu di Sumba, Florés, Alor, wan Pulau Roté. Sabujurnya, ada dua macam cendana, yaitu cendana putih nang ditanam di Nusa Teggara Timur wan cendana habang nang tumbuh di India.[1]

?Cendana

Klasifikasi ilmiah
Karajaan: Plantae
Divisi: Tracheophyta
Kelas: Angiospermae
Ordo: Santalales
Famili: Santalaceae
Genus: Santalum
Nama binomial
Santalum album
Linn.

Ngaran cendana jua dijadiakan ngaran jalan di Jakarta, nang mana jalan ngini ada wadahnya Parisidin Ripublik Indunisia nang ka-2 , yaitu Suharto. Wadan inya saurang andakannya di Jalan Cendana No 6-8, Menteng, Jakarta.[2]. Lain pada ngitu, di Banjarmasin jua ada ngaran "Jalan Cendana", nang mana ada banyak rumah makan wan hunian mahasiswa.[3][4]

Parawakan babak

Cendana baisi akar nang dangkal, maucir malintang, wan kada takaluar pada tanah nang kaya dinding kacapuri puhun di pangkalnya,[5]

Batang cendana babantuk bulat balakukan nang kalipaknya kasar wan bawarna cuklat tuha. Tanaman ngini kawa baisi diamitir kira-kira 40 santimitir wan tinggi kira-kira 12-20 mitir.[1][5]

Daun cendana tamasuk daun tunggal lunjung atawa bulat bahadapan nang baisi pinggir daun nang rata wan ujung daun nang tajam walaupun kawa jua mambulat.[5]

Kambang cendana tumbuh di hujung atawa katiak daun. Kambang ngini bakambang jadi buah batu nang bulat, nang mana baisi daging nang tipis.[5] Buah ngini bawarna hijau waktu masih anum wan bawarna habang atawa hirang kaunguan waktu sudah masak. Buah ngini baisi bigi nang babantuk bulat di dalam dagingnya, nang mana baisi kulit nang tipis wan baisi daging bigi atawa endosperm.[6]

Kandungam wan manfaat babak

Kayu cendana baisi kandungan minyak santalul nang babau harum. Minyak ngini didapat matan akar wan batangnya, nang mana harus mahadang 30-40 tahun sagan manamuakan bau harumnya.[1] Lain pada ngitu, cendana jua baisi minyak atsiri, hars, zat samak, santalin, santin, santenun, santalal, santalun, wan isufalirilaldihida.[5]

Kayu cendana rancak dipakai sagan maulah furnitur nang kaya mija, kursi, lamari, wan lainnya, maraga kayunya tabagus wan kawa dijual ka banua lain. Lain pada ngitu, kayu cendana rancak diulah sagan karajinan tangan, tatambaan, dupa, kusmitik, bahan antisiptik, wan maharumakan janajah.[1]

Jujuhutan babak

  1. ^ a b c d Ngatimin, Sri Nur Aminah; Uslinawaty, Zakiah (2019). Teknik Menanggulangi Serangga Hama Kehutanan Menggunakan Metabolit Sekunder Tanaman. Yogyakarta: LeutikaPrio. hlm. 11–12. ISBN 9786023717200. 
  2. ^ Sugiyarto (ed.). "Dulu Jadi Kebanggan, Kondisi Rumah Cendana Setelah Soeharto Meninggal, Sepi dan Terbengkelai". Tribunnews.com (dalam bahasa Indonesia). Diakses tanggal 2023-03-21. 
  3. ^ Noorhidayat. Widodo, Hari, ed. "Datangi Tempat Kos di Cendana, Lurah Sungai Miai Banjarmasin Imbau Mahasiswi Waspadai Pelaku Asusila". Banjarmasinpost.co.id (dalam bahasa Indonesia). Diakses tanggal 2023-03-21. 
  4. ^ Ramadhan, Wahyu. "Tanpa Mahasiswa, Warung-Warung Legendaris Sulit Bertahan; Pelanggan Jalan Cendana Direnggut Pagebluk | Radar Banjarmasin". kalsel.prokal.co (dalam bahasa Indonesian). Diakses tanggal 2023-03-21. 
  5. ^ a b c d e Hidayat, Syamsul; Napitupulu, Rodame M (2015). Kitab Tumbuhan Obat (dalam bahasa Indonesia). Jakarta: AGRIFLO. hlm. 92–93. ISBN 9789790026605. 
  6. ^ Tefu, Meti O. F. I. Tefu; Sabat, Dian (2021-11-01). Tanaman Obat Tradisional: Dokumentasi Pemanfaatan Tanaman Obat Masyarakat Suku Dawan (Amanuban) (dalam bahasa Indonesia). Sleman: Deepublish. hlm. 36–37. ISBN 9786230240003.