Haul Guru Sekumpul
Haul Guru Sekumpul adalah acara gasan mamparingati hari wapat Muhammad Zaini Abdul Ghani atawa nang rancak dikiau Guru Sekumpul, acara ngini diadaakan saban tahun di Martapura, Kabupatin Banjar, Kalimantan Selatan.
Acara ngini diadaakan saban tanggal 5 Rajap sasuai hari wapat Guru Sekumpul dalam pananggalan Hijriah. Haul ulama nang diranakakan 11 Pibuari 1942 atawa 27 Muharram 1361 di Tunggul Irang, Martapura, Kabupatin Banjar ngini jadi acara haul paakbarnya di Kalimantan Selatan bahkan jua dunia. Haul ngini sudah disiapakan talu sampai ampat bulan sabalumnya, marga jamaah nang datang babanyak tarus saban tahunnya.
Palaksanaan babak
Acara diisi pambacaan jikir, mulut Habsyi wan badu'a, di mana kadua anak lalakian aruwah yaitu Ahmad Hafi Badali wan Muhammad Amin Badali nang mamimpin, didangani lawan bubuhan ulama wan habib. Imbah ngitu sabarataan jamaah bulik ka dairah matannya masing-masing. Wayah tahun 2021 atawa haul ka-16, acara ngini kada diadaakan marga masih pandemi COVID-19.
Jamaah babak
Jamaah haul datang matan bamacam-macam dairah mulai Kalimantan Selatan, Kalimantan Tangah, Kalimantan Timur, Pulau Jawa, Sumatera, Malaysia, atawa jua Timur Tangah. Jumlah jamaah saban tahun sasain batambah, matan ratusan ribu bahkan yutaan.
Pangaruh Susial babak
Nang kaya aruh akbar lain jua, sajumlah pasiapan jua digawi jauh-jauh hari. Kada wastu panitia atawa kurdinatur acara haja nang auran, tagal sabarataan warga sapanjang jalan bamara makam Guru Sekumpul jua umpatan riuh. Kaya hajatan baimbai satahun sakali.
Sabarataan warga sakitar matan bamacam-macam ampah bamara Sekumpul babaik hati manyambut, mambari'i apa haja nang kawa bubuhannya bariakan gasan bubuhan tamu, pajiarah nang datang. Makanan, minuman dibagiakan warga mulai balasan kilumitir bamara lukasi haul. Sabarataan garatis, kadada nang basadia dibayar.
Kada wastu ngitu, ada jua nang manawari minyak garatis, tambal ban garatis, bicak garatis sampai mambariakan rumahnya gasan dijadiakan wadah pamalaman garatis gasan jamaah.