Kapulaga
Kapulaga atawa Ammomum cardamomum L. adalah ngaran tanaman tatamba nang tanyaman ditanam wan diharagu marga rasuk ditanam di dairah trupis. Ada dua janis kapulaga nang biasa ditanam di Indunisia, yaitu kapulaga subarang Elettaria cardamomum L wan kapulaga biasa. kapulaga kada hanya dipakai di makanan, tapi juwa gasan minuman duwa tatamba.[1]
Kapulaga disambat juwa dalam ngaran lain nangkaya Kardamon (Melayu), Palogo (Sumatera), Palago, puwar (Minangkabau), Kapulogo (Jawa), Kapol (Sunda), Kapolaha, Palagha (Madura), Garidimang (Bugis) Karkolaka (Bali),[2] pai thou kou (cina), cardamomom (yunani), krava (thai), elaichi (india) wan elakkaai dalam (bahasa tamil).
Tagal, Kapulaga nang banyak ditanam buhan patani adalah kapulaga biasa atawa kapulaga palsu marga kandungan minyaknya cuma 2-3,5% wan juwa baunya kada tapi manyangat, lamun Kapulaga subarang baisi kandungan minyak kikira 5-8% wan baunya kaciuman banar.[1] Di Indunisia, Kapulaga ditanam di 20 prupinsi wan nang paluasnya ada di Jawa Barat nang lahannya labih pada 27 ribu m2.[3]
Parawakan
babakKapulaga tamasuk ka dalam tanaman tatamba duwa tumbuh bakalumpuk, dilihat sakilas mahirip duwa tipakan, tingginya bisa sampai 2-3 m wan tumbuh labat di hutan-hutan, lawan tumbuh subur di katinggian 200-1.000 mdpl.[4]
Batang
babakKapulaga baisi batang basah nang bapalapah daun nang mamukung batangnya. Bantukannya bulat, tumbuh tagak wan tingginya 1-3 m. Batangnya cungul matan rimpang nang di bawah tanah. Sarumpun bisa sampai ma 30-50 batang, kalirnya ada nang habang kadap ada juwa nang putih ampah hijau.[4]
Daun
babakAndakan daunnya basulang sali, tunggal, batangking handap wan andakannya tahamburan bahadapan. Bantukan daun lunsit, panjangnya 20-55 cm, libarnya 2,5-11 cm. Tagal Kapulaga subarang daunnya tapanjang wan kalirnya sutil dipinandui pada kapulaga palsu, tagal juwa kalihatan matan pangkal wan ujung daunnya maluncup lawan tulang daunnya manyirip.
Kambang
babakKambang kapulaga tasusun dalam tandan nang takaluar matan bungkahnya.[2] Kambangnya Kapulaga palsu tasusun rapat babantuk bulir karucut tangkingnya babuku rapat, ada palindungnya nang tasusun nangkaya sisik wan biasanya kambang nang andakannya di hujung kada cagaran jadi buah. Tagal kambang Kapulaga subarang bakalir putih bacuring cuklat, daun palindungnya bakalir kubas wan ada tarus di ruang tangking buah.
Buah
babak
Buah kapulaga bantukannya bulat hintalu, babulu duwa bakalir kuning habuk. Buahnya takumpulan dalam tandan halus duwa handap. Pabila masak, buahnya cagar pacah wan mambilak bardasarkan ruang-ruangnya. Di dalamnya ada biginya nang babantuk bulat hintalu mamanjang.[1]
Kapulaga babuah rahatan umur 3 tahunan nang buahnya cagaran cungul matan batang palsu di parak tanah wan malayap baimbaian duwa tandannya sapanjang 1 m. Supaya kada lakas rigat, buhan patani biasanya malapisi panyu gasan wadah di bawah tandan buah ngitu. Buahnya cagaran diputiki pabila bantukannya padat wan sapalih masak.[1]
Batanam
babakKapulaga rasuk di tanam di tanah nang bahumus kandal, baaliran banyu bagus nang tiksturnya lampung bapasir, curah hujan nang sampai 2.500-4.000 mm satahun. Parihal ini marga banyak hujan cagaran maulah tangkingnya handap wan kambangnya banyak nang busuk, tagal lamun musim karing cagaran badikit anakannya jadinya badikit juwa kambangnya.[1]
Lamunnya handak batanam kapulaga paling baiknya di pamulaan musim hujan atawa parak bulan uktubir atawa Nupimbir. Handaknya diparhitakan banyunya jangan sampai kurang wan jangan panas banar, maraga Kapulaga ngini sansitip lawan karing.[1]
Bahan tanam matan biji handaknya ditaradak dulu salawasan 3-4 bulan tagantung tanahnya. Lamun sudah badaun, bibitnya dipindah ka lapang manunggu tingginya sampai 30-50 cm. Panin kapulaga bisa digawi imbah tanaman baumur 1,5-2 tahun sampai umur 10-15 tahun, wan digawi bisa sampai maampat kali satahun.[5]
Manpaat
babakKapulaga disambat urang rarampahan nang bagus gasan tatamba hirbal duwa gasan kusmitik, adapun manpaat kapulaga adalah malancarakan paparutan duwa manjaga labung sakira tatap sihat, maningkatakan paridaran darah, mahilangakan singkal, manjaga ginjal duwa jantung, gasan wahin duwa batuk.[1]
Jujuhutan
babak- ^ a b c d e f g Abay, Udin (2020-05-27). "Kapulaga, Komoditas Ekspor Yang Mudah Budidayanya". www.swadayaonline.com (dalam bahasa Indonesia). Diakses tanggal 2023-03-24.
- ^ a b "SITOBA". horti.pertanian.go.id. Diakses tanggal 2023-03-24.
- ^ Subagyo (2020-05-27). "Kapulaga, rempah Indonesia yang makin diminati pasar ekspor". Antara News. Diakses tanggal 2023-03-24.
- ^ a b Pasally, Sumanto (2020-05-02). "TANAMAN KAPULAGA". Kementrian Pertanian. Diarsipkan dari versi asli tanggal 2023-03-24. Diakses tanggal 2023-03-24.
- ^ Times, I. D. N.; intani, Dwi wahyu. "Cara Menanam Kapulaga, Rempah yang Banyak Dicari di Dunia". IDN Times (dalam bahasa Indonesia). Diakses tanggal 2023-03-24.