Saberan bin Kaderi
Saberan bin Kaderi atawa nang rancak dikiau Guru Saberan Kacil, adalah saurang ulama tasawuf nang baasal matan Kalimantan Selatan. Sidin lahir di Alabio, Amuntai, Kalimantan Selatan pas tahun 1900 wan habis umur pada tanggal 14 Marit 1970.[1]
Kahidupan awal
babakSidin suah balajar di Makkah waktu umur 15 tahun wan 27 tahun kainanya inya bulik ka Alabio gasan maajarakan ilmu ka masyarakat. Parak Indunisa mardika pada tahun 1945, inya pindah ka Banjarmasin gasan maajarakan ilmunya jua sagan masyarakat.[1]
Waktu kadatangan Walanda imbah Indunisa mardika, inya suah dipanjara ulih bubuhan NICA. Waktu inya dipanjara, sidin tadapat lawan Guru Idham Chalid lawan bubuhan panghuni panjara lainnya. Waktu di panjara, Guru Saberan Kacil maajarakan ilmunya sampai suah mambarii wafak lawan bubuhan panghuni panjara lainnya.[1]
Malawani aliran nang basalahan
babakK.H. Saberan Kacil tarkanal maraga sidin manantang ajaran nang ada dalam kitab tasawuf Al-Durr al-Nafis. Pas tahun 1930-an sampai 1960-an, inya badua lawan Muhammad Khalid Tangga Ulin baisi pandangan bahwa kitab nangini ada mangandung kasalahan nang baujung bisa manyasatakan umat Islam.[2][3] Sidin jua suah malawan aliran nang basalahan lawan ajaran Islam, nang mana aliran ngitu maajarakan bahwa imbah urang mandapat ilmu hakikat, urang ngitu kada usah baibadat wan manjalanakn syariat nang kaya sumbahyang, puasa, haji, wan lainnya. Waktu malawan aliran ngitu, sidin jua suah mambawai pamarintah wan tantara nang kaya Brigjend Hassan Basry wan lainnya.[1]
Pamakaman
babakMagun diranakakan di dairah Hulu Sungai Utara, tatapi waktu inya maninggal, Guru Saberan Kacil dikuburakan jauh matan kampung kalahirannya. Sidin bapatak di Kalurahan Teluk Dalam, Banjarmasin Tengah, Banjarmasin, Kalimantan Selatan.[4]
Jujuhutan
babak- ^ a b c d Barije, Ahmad (2018). Mengenal Ulama dan Tokoh Banjar. Banjarmasin: CV Rahmat Hafiz Al Mubaraq.
- ^ Rahmadi, S.Ag., M.Pd.I, Drs. H. M. Husaini Abbas, Drs. Abd. Wahid (2022). "ISLAM BANJAR: DINAMIKA DAN TIPOLOGI PEMIKIRAN TAUHID, FIQIH DAN TASAWUF" (PDF). IAIN Antasari Press: 121.
- ^ Putra .A, I. Kadek (2022-01-01). "Guru Saberan Kacil bin H. Kaderi".
- ^ "Makam KH.Saberan Kecil Bin H.Kaderi - Jl. Mayjen Sutoyo S No.16, Tlk. Dalam, Kec. Banjarmasin Tengah, Kota Banjarmasin, Kalimantan Selatan 70117". bkppkutim.com. Diakses tanggal 2023-12-02.