Wikipidia

Dadangkak

Dadangkak atawa Hydrolea spinosa L. adalah ngaran tanaman nang hidup di baruh atawa pahumaan imbah mangatam nang rajin dipakai gasan tatamba garing. Tanaman ngini jua disambat urang lawan ngaran Pipisangan baduri atawa Jeruju (Teluk Selong, Martapura).[1]

Kambang Dadangkak

Dadangkak ngini marupakan tanaman katurunan matan kantang.[2] Idabul ngini panambayan disambat lawan Carl von Linné .[3]

Parawakan

babak

Dadangkak banyak ditamui di dairah nang katinggiannya < 50 m diatas parmukaan laut (mdpl), misalnya di higa sungai lawan baruh di Kalimantan Selatan. Sahdan, tanaman ngini dijadiakan panciri lahan basah.[4] Rajin, Dadangkak tumbuh di lahan basah nang tarang duwa di padang nang sudah suah diugai nangkaya di pacirin atawa pasisir pantai. Ada juwa parian Dadangkak nang tumbuh di padang bakas imbah baah atawa padang nang sudah lawas kada dipakai.[5]

Batang

babak

Dadangkak dipinandui lawan batang nang tagasnya nangkaya tabung wan sipatnya bakayakap, babalang hijau, babulu halus balang putih lawan juwa bapanting nang andakannya di parak aksilar.[5]

 
Tanaman Dadangkak atawa Jeruju

Daun

babak

Daunnya bapanjang, higanya rata, bajariji atawa bagalumbang, tulangnya manyirip, babau kada nyaman lawan rasanya pahing.[5]

Kambang

babak

Kambangnya baisi tangkai nang baunggut wan manyurangan haja, kalupaknya tabagi jadi 5, babalang hijau wan babulu halus. Tabung mahkuta nangkaya curung lawan babalang bigi ramania. Kambang cagaran malarak wayah bulan Juni sampai ka Uktubir. [5]

Buah

babak

Buahnya mamanjang nang taandak di lunasnya kambang. Tagas buahnya nangkaya kapsul bulat sampai bulat mahintalu, ada kalanjar-puber di bagian atasnya, wan malarak baaturan. Tagas bigi mambulat hintalu sampai silindir, rata, bubungannya mamanjang, lawan kupit di parsandian. Dadangkak sudah lawas dipinandui sawagai parian tanaman nang bamacam huarannya utamanya dalam hal rambut halus, panting, tagas wan ganal daun, atawa kapsulnya.[6]

Kabanyakan parian ngini titiringannya takait lawan kaadan lingkungan di situ. Tagal, parian matan Amerika Tengah biasanya nang paling runcing wan paling kipit, nang kambangnya tahalus duwa tarundun. Adapun parian matan Amerika Selatan subalah tenggara baisi panting tasadikit (atawa kadada babanar), kambangnya bacikang banyak, taganal duwa kada tapi bakuaya.[6]

Kagunaan

babak

Daun Dadangkak ngini dipakai lawan masyarakat gasan tatamba garing, iatu daunnya dikacak wan diandak di dahi. Banyu jarangan daun dadangkak juwa diparcaya gasan manurunakan gula darah rahatan bapuasa. [7] Bubuhan Dayak Bukit Loksado mamakai tanaman ngini gasan tatamba kana wisa, batuk tiring, luka wan sawan juwa pangusir nyamuk. Bagian tanaman nang dipakai adalah daun duwa batang.[4]

Bubuhan Dayak Bakumpai di Barito Kuala duwa di Hulu Sungai Tengah lawan Hulu Sungai Selatan mamakai tanaman ngini gasan tatamba mariap dingin duwa kana wisa. Urang di Kabupatin Tanah Laut mamakai daunnya gasan tatamba panyakit panyiutan salajur gasan kana wisa juwa.[4]

Daun pahing matan Dadangkak dipakai dalam papahan di Brasil gasan manyuburakan rambut. Galapung matan daun kawa dimakani ka sapi gasan manambahi pruduksi susu.[8] [9]

Jujuhutan

babak
  1. ^ Forestryana, Dyera; Yunus, Rahmat (2018). "KAJIAN FARMAKOGNOSTIK TUMBUHAN JERUJU (HYDROLEA SPINOSA L.) ASAL DESA TELUK SELONG MARTAPURA KABUPATEN BANJAR KALIMANTAN SELATAN". Borneo Journal of Pharmascientech. 2. 
  2. ^ Roskov Y., Kunze T., Orrell T., Abucay L., Paglinawan L., Culham A., Bailly N., Kirk P., Bourgoin T., Baillargeon G., Decock W., De Wever A., Didžiulis V. (ed) (2019). "Species 2000 & ITIS Catalogue of Life: 2019 Annual Checklist". Species 2000: Naturalis, Leiden, the Netherlands. ISSN 2405-884X. TaxonID: 53590357. Diarsipkan dari versi asli tanggal 2019-12-18. Diakses tanggal 2019-11-11. 
  3. ^ L. (1763), In: Sp. Pl. 328
  4. ^ a b c Dharmono (2007). "Kajian Etnobotani Tumbuhan Jaruju (Hydrolea spinosa) suku Dayak Bukit Loksado". Paradigma Jurnal Pendidikan MIPA. 1: 2. 
  5. ^ a b c d "Plants of Louisiana". warcapps.usgs.gov. Diakses tanggal 2023-03-07. 
  6. ^ a b "Hydrophyllaceæ, The Water-Leaf Tribe". www.c82.net (dalam bahasa Inggris). Diakses tanggal 2023-03-07. 
  7. ^ Aditya, Muhammad (2018). "PENGARUH REBUSAN AIR DAUN DADANGKAK ( Hydrolea spinosa l. ) TERHADAP KADAR GULA DARAH SEWAKTU DAN KADAR GULA DARAH PUASA DI WILAYAH KERJA PUSKESMAS CEMPAKA BANJARMASIN" (PDF).  line feed character di |title= pada posisi 60 (bantuan)
  8. ^ Adolf Engler (1913). "Das Pflanzenreich". Heft 59. IV, 251: 25. 
  9. ^ Theodor Peckolt (1905). "Heil- und Nutzpflanzen Brasiliens". Ber. deutsch. pharm. Ges. (Berichte der Deutschen Chemischen Gesellschaft) (dalam bahasa Jerman). XI: 99. Diarsipkan dari versi asli tanggal 2023-03-03. Diakses tanggal 2023-03-03. 
Dijumput matan "https://bjn.wikipedia.org/w/index.php?title=Dadangkak&oldid=97058"