Wikipidia

Durian

Durian ialah ngaran tumbuhan tarupis nang bamula matan Asia Tanggara, sakaligus ngaran buahnya nang kawa dimakan. Ngaran ngini diambil matan ciri has kulit buahnya nang karas wan balakuk-lakuk landap hampai sama wan duri. Sambatan paling dikanal ialah "raja matan sagala buah" (King of Fruit). Durian ialah buah nang kontroversial, biar banyak urang nang katuju, tapi ada jua nang lain malah muak lawan baunya.

?Durian
Durian, Durio zibethinus
Durian, Durio zibethinus
Klasifikasi ilmiah
Karajaan: Plantae
(tidak termasuk) Eudikotil
(tidak termasuk) Rosidae
Ordo: Malvales
Famili: Malvaceae
Genus: Durio
Spesies: D. zibethinus
Ngaran binomial
Durio zibethinus
Rumph. ex Murray

Sabujurnya, tumbuhan nang bangaran durian lain janis tunggal tapi sapadaan tumbuhan matan marga Durio.[1] Tapi, nang dimaksud lawan durian (kada ditambahi apa-apa) biasanya ialah Durio zibethinus. Janis-janis durian lain nang kawa dimakan wan rancak ditamuakan di pasar wadahnya ada di Asia Tanggara di antaranya adalah lai (D. kutejensis), kerantungan (D. oxleyanus), durian kura-kura atawa kekura (D. graveolens), lawan lahung (D. dulcis). Wan satarusnya, uraian di bawah ngini baasal pada D. zibethinus.

Ngaran-ngaran lukal

babak

Ada banyak ngaran lukal. Ngaran paling banyak ditamuakan di Kalimantan, nang maacu pada bamacam-macam varietas wan spesies nang balainan. Durian di Jawa sambatannya duren (bahasa Jawa, bahasa Betawi) wan kadu (bahasa Sunda). Di Sumatra sambatannya durian wan duren (bahasa Gayo). Di Sulawesi, urang Manado manyambatnya duriang, amun urang Toraja duliang. Di Kota Ambon wan kepulauan Lease biasa manyambat Doriang. Di Pulau Seram bagian timur sambatannya rulen.[2]

Botani

babak
 
batang wan cabang puhun durian di Cimahpar, Bogor

Hamburan

babak

Pusat bamacam-macam durian adalah Pulau Kalimantan.

 [butuh rujukan]

Daerah-daerah di paraknya jua baisi babarapa plasma nutfah durian, nang kaya Mindanao, Sumatra, wan Semenanjung Malaya tapi kada salimpuar di Kalimantan. Walaupun nang kaya itu, pangekspor utama durian adalah Thailand, nang kawa mangambangkan kultivar bamutu tinggi wan sistem budidaya nang baik. Wadah lain nang mambudidayakan durian nang baorientasi ekspor adalah Mindanao di Filipina, Queensland di Australia, Kamboja, Laos, Vietnam, India, wan Sri Lanka.

Di Filipina, pusat panghasil durian adalah di daerah Davao di Pulau Mindanao. Festival Kadayawan nangitu aruh tahunan gasan durian di Davao City.

Pemerian morfologi

babak

Puhun tahunan, hijau abadi (panjatuan daun kada bagantung musim) tapi ada wayahnya gasan manumbuhakan daun-daun hanyar (periode flushing atawa parupaan) nang jadi imbah masa babuah tuntung. Tumbuh tinggi kawa sampai katinggian 25–50 m tagantung spesiesnya,[3] puhun durian rancak baisi banir (akar papan). Pepagan (kulit batang) bawarna cuklat kahabangan, mangalupas kada baaturan. Tajuknya rindang wan ranggang.

Daunnya babentuk jorong sampai lanset, 10-15(-17) cm × 3-4,5(-12,5) cm; andaknya basulisih; balunggai; bapangkal lancip atawa tumpul wan baujung lancip malandai; sisi atas bawarna hijau tarang, sisi bawah tatukup sisik-sisik bawarna perak atawa keemasan lawan bulu-bulu bintang.[4]

Kambang (lawan buahnya) cungul langsung matan batang (cauliflorous) atawa cabang-cabang nang tuha di bagian pangkal (proximal), bakalumpuk dalam

Barakas:Durian Manis.jpg
Buah Durian

karangan baisi 3-10 kuntum nang bentuknya tukal atawa malai rata. Kuncup kambangnya bulat, sakitar 2 cm diameternya, balunggai panjang. Kalupak kambang bentuknya tabung panjang lk. 3 cm, daun kalupak tambahan pacah jadi 2-3 cuping bentuknya bulat hintalu. Mahkotanya bentuknya sudip, kira-kira 2× panjang kalupak, nang jumlahnya 5 halai, kaputih-putihan. Benang sarinya banyak, tabagi ka dalam 5 berkas; kapala putiknya bantuknya bungkul, lawan lunggai nang babulu.[4] Kambangnya cungul matan kuncup dorman, malarak pas kalamari wan tahan sampai bahari-hari. Wayah siang hari kambang manutup. Kambang ini mahingur bau harum nang asalnya matan kelenjar nektar di bagian pangkalnya gasan manarik pahatian kalalawar gasan panyarbukan utamanya.[5] Kajian di Malaysia pada tahun 1970-an manunjukakan bahwasanya panyarbuk durian adalah kalalawar Eonycteris spelaea. Penelitian tahun 1996 labih jauh manunjukakan bahwa hewan lain, nang kaya burung madu Nectariniidae wan wanyi umpat jua dalam panyarbukan tiga kula durian nang lainnya.[3][6]

 
Kambang durian, kaluar langsung matan batang/cabang sacara barkalompok

Buah durian batipe kapsul babentuk bulat, bulat hintalu sampai lunjung, lawan panjangnya sampai 25 cm wan diameter sampai 20 cm.[4] Kulit buahnya tabal, pamukaannya basudut tujum ("baduri", makanya disambat "durian", walaupun ini lain duri dalam artian botani), bawarna hijau kakuning-kuningan, kacuklatan, sampai kahabukan.

Buahnya bakambang imbah pambuahan wan parluk 4-6 bulan gasan pamangkalan. Wayah masa pamangkalan tadi ada saingan antarbuah pada satu kalumpuk, sampai jadi satu atawa babarapa buah nang kaina mulai masak, wan sisanya gugur. Buah kaina gugur saurang bila sudah masak. Nang rancak itu bila barat buah durian kawa sampai 1,5 hingga 5 kilogram, hingga kebun durian jadi kawasan nang babahaya wayah musim durian. Apabila gugur di atas kapala urang, buah durian kawa maulah luka-luka atawa jua kamatian.

Tiap buah baisi lima ruang (awam manyambatnya "hapat"), nang manunjukakan banyaknya daun buah nang baisi. Masing-masing hapatan baisi babarapa biji, biasanya tiga biji atawa labih, lunjung sampai 4 cm panjangnya, wan bawarna habang anum kacuklatan mangkilap. Bijinya babungkus arilus (kulimbit biji, nang biasa disambat "daging buah" durian) warnanya putih sampai kuning tarang lawan tabalnnya nang bavariasi, amun pada kultivar unggul katabalan arilus ini kawa sampai 3 cm. Biji lawan kulimbit biji dalam padagangan disambat ponggè. Pemuliaan durian diarahkan gasan mahasilakan biji nang halus lawan kulimbit biji nang kandal, ulihnya kulimbit biji ini pang bagian nang dimakan. Babarapa varietas unggul mahasilakan buah lawan biji nang kada bakambang tapi lawan kulimbit biji nang kandal (disambat "sukun").

Buah Durian
Buah Durian

Kaanekaragaman

babak

Durian banyak banar macamnya. Nang kaya disambat di muka, babarapa spesies salain durian benar (D. zibethinus) jua dianggap sabagai durian. Di Indonesia tacatat ada 20 spesies angguta Durio (matan parak 30-an jenis), sembilan di antaranya kawa dimakan.[3][7] Durian nang bujur gin baisi banyak variasi. Lembaga penelitian di Indonesia, Malaysia, wan Thailand sudah marilis bamacam kultivar durian unggul. Salain itu ada jua ras-ras lokal nang dikanal baik tapi baluman maalami tahap seleksi gasan maningkatakan kualitasnya.

Kultivar unggul nasional

babak

Tadapat labih pada 55 varietas/jenis durian budidaya. Sampai 2005 tadapat 38 kultivar unggul nang sudah diseleksi wan dibanyaki sacara vegetatif.[7] Babarapa di antaranya:

  • 'Gapu ', matan Puncu, Kediri, Jawa Timur
  • 'Hepe', bijinya kempis lawan daging kandal
  • 'Kelud', matan Puncu, Kediri, Jawa Timur
  • 'Ligit', matan Kutai
  • 'Mawar', matan Long Kutai
  • 'Ripto', matan Trenggalek
  • 'Salisun', matan Nunukan
  • 'Sememang', matan Banjarnegara
  • 'Tong Medaye', matan Lombok, NTB
  • 'Bentara', matan Kerkap, Bengkulu Utara
  • 'Bido Wonosalam', matan Jombang, Jawa Timur
  • 'Perwira', matan Simapeul, Majalengka
  • 'Petruk', matan Dukuh Randusari, Desa Tahunan, Jepara, Jawa Tengah[8]
  • 'Soya', matan Ambon, Maluku
  • 'Sukun', bijinya kempis lawan daging kandal
  • 'Sunan', matan Boyolali
  • 'Kani' ("chanee", durian bangkok)
  • 'Otong', (alihnama matan durian "monthong", durian bangkok, di Malaysia disebut klon D159)
 
Durian lokal di Cigudeg, Bogor

Ras lukal

babak

Babarapa ras lukal baluman diseleksi, sampai masih bavariasi wan kaunggulannya balum tajamin. Biasanya dingarani sasuai lukasi geografi. Babarapa di antaranya adalah:

  • Durian parung
  • Durian lampung
  • Durian jepara
  • Durian palembang
  • Durian padang
  • Durian Merah Banyuwangi

Kultivar unggul matan luar negeri

babak

Di Malaysia, kultivar durian unggul hasil seleksi dibari kode numur lawan huruf D di mukanya. Babarapa di antaranya adalah

  • 'D24'
  • 'D99'
  • 'D123'
  • 'D145'
  • 'D158'
  • 'D159' (klon sama lawan varietas 'Montong').
  • 'D169'
  • 'MD-UR 888' (Durian Paling Baik Dunia)

Budidaya wan Mambanyakakan

babak
 
Puhun durian asal biji nang lagi berbuah

Durian adalah buah tropis, tumbuh di parak khatulistiwa sampai katinggian 800 m dpl., imbah itu bajauh sampai garis lintang 18° di Thailand wan Queensland.

Syarat tumbuh wan pamupukan

babak

Curah hujan nang dikatujui sakurang-kurangnya 1500 mm, nang hamburannya rata satahunan. Tapi, periode karing 1-2 bulan kaina marangsang pangambangan nang labih baik. Musim raya buah durian biasanya imbah tahun lawan musim kamarau nang bakapanjangan. Musim mangatam antara kawa jua lawan produksi buah nang biasa-biasa saja.

Tanaman ini mamarluakan tanah nang dalam, ringan wan berdrainase nang baik. Derajat keasaman uptimal adalah 6-6,5. Tanah masam, nang kaya latosol atawa podsolik habang kuning mamarluakan pangapuran supaya tanaman tumbuh baik. Durian anum jua parlu lindungan alam, supaya puhun atawa cabang-cabangnya nang hibak buah kada patah ditiup angin nang kuat. Muka banyu tanah kada bulih kurang matan 150 cm ulih sabab banyu tanah nang talalu randah baakibat buah kurang manis.

Pemupukan digawi lawan maulah parit halus di kuliling puhun imbah itu dihamburi pupuk kimia. Pupuk kandang dibarii pas wayah pananaman bibit. Pamupukan lawan kadar NPK nang sama dibariakan langsung imbah musim babuah, amun pamupukan lawan kadar P nang labih tinggi dibariakan imbah flushing tuntung gasan manyiapakan pangambangan.

Pananaman wan pamaliharaan

babak

Pananaman durian sacara komersial di kabun digawi lawan jarak tanam 10 m × 10 m hingga 12 m × 12 m, tagantung matan ukuran tanaman/kultivarnya.[2] Amun tanaman masih halus, tumpang sari kawa digawi. Pangandalian gulma jua parlu digawi.

Pamaliharaan mancakup pamupukan, pamangkasan (pambantukan wan paremajaan), pambanyuan (amun parlu), wan pangandalian hama wan penyakit.[2] Tajuk durian nang baik adalah nang bentuknya karucut mambulat, lawan cabang utama mandatar ka higa.

Pambanyakan

babak

Pambanyakan durian di kampung-kampung biasanya mamakai biji. Pambanyakan lawan biji jua digawi gasan mangulihi batang bawah dalam pambanyakan vegetatif. Biji durian basifat recalcitrant, hanya kawa hidup lawan kadar banyu tinggi (di atas 30% barat) wan kadada parlakuan tartentu cuma sanggup tahan saminggu sabalum akhirnya kaina embrionya mati. Imbah nang kaya itu biji harus langsung disemaiakan imbah buahnya dibuka.

Puhun durian mulai babuah imbah 4-5 tahun, tapi dalam budidaya kawa lakas amun mamakai bahan tanam hasil pambanyakan vegetatif. Teknik-teknik nang dipakai adalah pancangkokan (jarang digawi), panyusuan (jarang digawi), panyambungan sanding (inarching), panyambungan calah (cleft grafting), atawa okulasi (budding).[2] Teknik nang pandudian ini wayah ini nang paling banyak digawi. abarapa panangkar wayah ini jua manarapakan panyambungan mikro (micrografting). Teknik ini digawi pas wayah batang bawah masih baumur anum hingga malakasi masa mahadang. Tacatat bahwa durian hasil pambanyakan vegetatif kawa bakambang imbah 2-3 tahun.

Durian jua mamungkinakan dibanyak sacara in vitro (kultur jaringan).

Hama wan panyakit

babak

Hama nang manyarang durian di antaranya adalah hulat pangirik buah (gala-gala), hulat pangirik kambang, wan kutu luncat durian (maisap cbanyuan daun anum).[2]

Panyakit utama durian adalah buruk akar wan batang Pythium complectens, mati bibit (jua ulih patogen nang sama), panyakit blendok/kanker Phytophthora palmivora, wan jamur upas nang manyarang batang/cabang.[2][9]

Kagunaan

babak
 
Tampuyak, durian nang diwadi
 
Es krim durian di Padang

Durian utamanya diharagu urang gasan buahnya, nang umumnya dimakan (arilus atawa kulimbit bijinya) dalam kaadaan sigar. Kulimbit biji ini umumnya manis wan bagizi banar ulihnya mangandung banyak karbohidrat, lemak, protein, wan mineral.[4]

Wayah musim raya durian, buah ini kawa mahasilakan balimpuar, utamanya di sentra-sentra produksinya di daerah. Sacara tradisional, daging buah nang balabihan ini kawa diawitakan lawan mamasaknya campur gula jadi ngarannya dodol durian (biasa disambat lampuk), atawa manjaruknya jadi tampuyak. Imbah itu, tampuyak nang rasanya masam ini kawa jadi bahan masakan kaya sambal tampuyak, atawa gasan campuran mamasaki iwak.

Durian gin rancak diulah jadi campuran bahan wadai-wadai tradisiunal, nang kayai gelamai atawa jenang. Rancak jua, durian dicampurakan dalam hidangan nasi pulut (ketan) bacampur lawan santan. Dalam dunia wayah kini, durian (atawa baunya) biasa dicampurakan dalam gula batu, es krim, susu, wan macam jenis minuman sigar nang lain.

Bijinya kawa dimakan gasan camilan imbah dijarang atawa dibanam,[4] atawa dicampurakan dalam kolak durian. Biji durian nang mantah itu baracun wan kada kawa dimakan ulih mangandung asam lemak siklopropena (cyclopropene).[10] Biji durian mangandung kira-kira 27% amilosa.[11] Kuncup daun (pucuk), mahkota kambang, wan buah nang anum kawa dimasak jadi sayuran.

Durian (Durio zibethinus)
Nilai nutrisi per 100 g (3,5 oz)
Energi 615 kJ (147 kcal)
Karbohidrat 27.09 g
- Serat pangan 3.8 g
Lemak 5.33 g
Protein 1.47 g
banyu 65g
Vitamin C 19.7 mg (33%)
Kalium 436 mg (9%)
Hanya bagian nang dapat dimakan, mentah atau beku.

Brangkasan: 68% (Shell and seeds)

Sumber: USDA Nutrient database[12]

Persentase merujuk kepada rekomendasi Amerika Serikat untuk dewasa.

Babarapa bagian tumbuhan karancakan dimanfaatkan jadi bahan tatamba tradisiunal. Akarnya dimanfaatkan jadi tatamba awak panas. Daunnya, dicampur lawan jariangau (Acorus calamus), dipakai gasan maampihakan cantengan (infeksi di kuku). Kulit buahnya gasan tatamba ruam di kulit (sakit kurap) wan ngalih bahira (sembelit). Kulit buah ini gin biasanya dibanam wan habunya dipakai dalam ramuan gasan malancarkan datang bulan wan manggugurkan urang batianan. Habu wan banyu randaman habu ini jua dipakai jadi campuran pawarna tradisiunal.[13]

Babarapa masyarakat di Jawa mamakai kulit durian nang sudah dimakan gasan mausir (repellent) nyamuk nang diandak di buncu ruangan.

Kayu gubalnya bawarna putih wan tarasnya kahabang-habangan. Hampul, tapi kada awit banar wan lakas dimakan rayap. Biasanya dipakai gasan pakakas rumah, pati-pati pengemas, wan bahan konstruksi nang hampul di bawah hatap, asalkan kada basampukan lawan tanah.[13]

Nilai gizi

babak

Tiap 100 g kulimbit biji mangandung 67 g banyu, 28,3 g karbohidrat, 2,5 g lemak, 2,5 g protein, 1,4 g serat; lawan baisi nilai energi sajumlah 520 kJ. Durian jua banyak mangandung vitamin B1, vitamin B2, wan vitamin C; lawan kalium, kalsium wan fosfor.[4]

Sarabanya buah durian

babak

Masalah bau

babak
 
Pelarangan durian di MRT Singapura.

Ulih baunya nang liwar mahingur wan pina buruk (ujar sabagian urang), sajumlah parusahaan wan maskapai panarbangan kada mambulihi urang mambawa durian, misalnya di kabin pasawat udara, di kandaraan angkutan umum atawa dibawa masuk ka hotel.

Bagi nang katuju durian, supaya kada manimbulkan hal-hal kada dikatujui ulih urang nang kada katuju bau durian, diparcayai ada cara nang nyaman gasan mahilangkan bau durian di jari-jari tangan wan muntung. Jari tangan dibarasihi lawan maduk-aduk banyu di dalam pangsa durian (kulipak kulit buah bagian dalam, bakas wadah daging wan biji durian marikit) wan banyu adukan nangitu jangan dibuang, tapi dipakai gasan bakumur, nangitu dinilai efektif.[14]

Mangatam durian

babak

Di Kabupaten Ketapang Kalbar mangatam durian tiap tahun cungul di bulan Januari atawa Februari. Gasan tahun 2006, di luar kabiasaan, buah salang (buah lain musim) sakalinya cukup banyak dihasilakan. Biarpun mangatam buah nangini kada ganal (ulih buah salang) tapi ulih banyak lukasi kabun nang babuah maka cukup banyak jua nang ada di pasaran. Mangatam paling ganal nangini datang matan tanaman masyarakat di Kecamatan Sukadana nang jua marupakan sentra produksi durian di Kabupaten Ketapang. Di kawasan ini salain dibudidayakan, masih banyak buah durian nang tumbuh liar. Buah durian ini tamasuk spesies endemik di Kabupaten Ketapang, babarapa jenis durian liar ada di kawasan kabupaten Ketapang. Janisnya bamacam-macam, kaya durian teratong, durian lahong, durian lei, durian tembranang. Babarapa jenis durian nangitu biar kada komersial, tapi gasan sumber gen plasma nuftah nang baguna banar gasan pemulyaan. Ngaran ilmiah spesies liar cukup banyak antara lain durian burung, durian kura kura kura nang buahnya dipangkal batang atawa di pangkal akar. Durio kutejensis ( durian pekawai) , Durio oxlevanus, Durio graveolens, dan Durio dulcis (lahong). Bamacam jenis spesuies liar banyak tadapat di hutan lawan warna, bau wan bentuk nang bamacam-macam. Ulih banyaknya spesies di kawasan ini maka mambuktiakan bahwa Kabupaten Ketapang adalah salah satu tempat pahamburan durian. Para ahli wahini lagi maneliti babarapa jenis varitas liar nangitu.

Mamilih durian

babak
 
Mahingut bau durian sebelum manukar
 
Daging buah durian lokal warnanya jingga atawa habang umumnya labih manis daripada warna kuning atawa putih.
 
Pedagang buah durian kemasan di Manhattan, Amerika serikat.

Tiap urang baisian caranya saurang dalam hal mamilih buah durian nang paling baik. Masing-masing urang parcaya bahwa cara pamilihannya kawa mangulihi buah nang paling baik.

Durian adalah buah musiman nang dulunya dikatam sakali satahun. Wayahini mangatam durian kawa digawi sampai dua kali setahun. Hal ini maningkatakan pasaingan di antara para panjual eceran.

Mamilih buah nang pas itu penting banar amun padagang manjual buah nang kaya apa adanya, kada bulih dikuyak. Wahini padagang umumnya hakun manguyak buah gasan mambuktiakan isinya. Lawan cara ini, kaahlian dalam mamilih pun jadi kada tapi penting.

Urang kawa mamilih durian nyaman banar di kabun. Buah matan puhun nang sama umumnya baisi ciri-ciri nang sarupa. Lazimnya buah di kabun dibiarakan masak wan gugur matan puhunnya ("durian jatuan").

Pemilihan buah di luar kabun labih ngalih. Di bawah ini adalah sabagian matan patunjuk seleksi nang kawa dipakai:

  • Kasigaran buah kawa ditantuakan matan lunggainya. Amun buah sudah gugur matan puhun, lunggainya kaina bamula karing. Padagang nang kada jujur dicubanya gasan malilit atawa mangecat lunggai gasan mahalangi pambeli maminandui kasigarannya. Padagang nang kada tapi pintar mungkin malah mambuang lunggai durian.
  • Kabanyakan paminat katuju buah durian nang karing wan masak. Cara nang nyaman gasan maminandui apakah isi durian itu karing tanpa manguyak buah adalah lawan mangguncangakan buah wan marasaakan gataran halus. Isi durian nang lambap barikit di kulit buah. Isi durian nang karing pina nyaman tapacul matan dinding buah. Urang harus bahati-hati supaya kada taguris olih duri buah durian pas manggawinya ini.
  • Durian mungkin disarang olih hulat perusak nang bahintalu di dalam buah nang bakambang jadi larva. Wayah manukar buah durian pembeli harus mahindari buah nang balubang pada kulitnya ulih rancak ini adanya "hulat" di dalam buah.

Mambalah durian

babak
Barakas:Makan durian.jpg
Balah Durian

Urang nang hanyaran balajar manukar durian dianjurakan manukar durian nang sudah siap dibuka ulihnya mambalah durian itu ngalih. Biasanya kita kawa nyaman manamuakan padagang nang mambari palayanan mambalah durian. Bila pembeli sudah akur manukarinya, padagang biasanya mau mambalah durian sabagai palayanannya. Buhannya hakun haja manggawiakan, biar buhannya kada mamindahakan isinya ka dalam bungkusan lain. Amun buah durian nang sudah dibalah parlu lakas dimakan ulih buah itu pina lakas "bapaluh". Bila isi durian mulai mangulihi banyu, buah durian bisa hilang rasanya wan kada banyak gunanya.

Urang kawa balajar mambalah durian lawan kahati-hatian pakai alat nang biasa ada. Itihi kulit luar buah gasan manamuakan "garis" (kampuh) panjang di pamukaan di mana duri durian basusun mambentuk garis lurus. Umumnya ada sampai 5 garis panjang pamukaan buah durian.

 
Mambalah durian

Bagian lunggai durian harus dibalikakan wan garis urat durian kaina batamu di satu titik di ujung buah. Bagimit haja mancucuk benda tajam (lading) di titik ini, imbah itu lalu sayatkan sapanjang "garis" nang sudah kalihatan sabalumnya. Sarung tangan atawa sahalai kain nang kandal kawa dipakai gasan maingkuti buah durian lawan subalah tangan, pahadangan tangan nang sabutingnya gasan manggawi tugas ini. Hati-hati tacucuk duri durian.

Bila kulit buah durian sudah takuyak jadi dua bagian, isi di dalam sudah siap gasan dimakan. Hapat labihnya kawa dibalah lawan mamakai tapak tangan lawan cara marabit ujung kulit durian sadikit di sapanjang pusat titik tengah sabalumnya.

Panas

babak

Menurut banyak kisah nang bakambang di masyarakat (urban legend), Durian dianggap sabagai makanan nang panas, wan habis makan durian biasanya awak kaina bapaluhan. Cara nang umum dipakai gasan maatasinya adalah lawan manuangakan banyu tawar di bagian kulit buah nang sdh kusung, imbah itu diminum. Lain pada itu, musim durian biasanya baimbaian lawan musim manggis, yaitu buah nang dianggap mandinginakan awak. Lawan jua, kadua buah imbah itu dimakan sama-sama.

Sacara ilmiah, klaim-klaim di atas kada parnah tabukti. Kamungkinannya ialah ulih kandungan nutrisi durian nang padat, urang nang makan durian rancak makan kabanyakan hingga akhirnya maalami kanaikan tekanan darah. Hal nangitu adalah reaksi nang alamiah amun talalu banyak mamakan makanan apa haja.

Durian kada baduri

babak

Sabagian durian dijual "kada baduri". Duri buah durian ini sakalinya sudah dibuang pas wayah duriannya masih anum. Jadi kada alami. Sabagian durian dasar parak kada baduri ulih durinya kurang dari 5 mm.

Catatan Batis

babak
  1. ^ "GRIN Taxonomy for Plants - Durio". Departemen Agrikultur Amerika Serikat. 
  2. ^ a b c d e f Durian. Petunjuk Budidaya dari PT Pusri.[permanent dead link]
  3. ^ a b c Brown, Michael J. (1997). Durio — A Bibliographic Review (PDF). International Plant Genetic Resources Institute (IPGRI). ISBN 92-9043-318-3. Diakses tanggal 2008-11-20. 
  4. ^ a b c d e f Verheij, E.W.M. dan R.E. Coronel (eds.). 1997. Sumber Daya Nabati Asia Tenggara 2: Buah-buahan yang dapat dimakan. PROSEA – Gramedia. Jakarta. ISBN 979-511-672-2. Hal. 192-198.
  5. ^ Whitten, Tony (2001). The Ecology of Sumatra. Periplus. hlm. 329. ISBN 962-593-074-4. 
  6. ^ Yumoto, Takakazu (2000). "Bird-pollination of Three Durio Species (Bombacaceae) in a Tropical Rainforest in Sarawak, Malaysia". American Journal of Botany. 87 (8): 1181–1188. doi:10.2307/2656655. 
  7. ^ a b Uji, T. 2005. Keanekaragaman Jenis dan Sumber Plasma Nutfah Durio (Durio spp.) di Indonesia Archived 2012-03-27 at the Wayback Machine. Buletin Plasma Nutfah 11:28-33.
  8. ^ "Durian Petruk". IPTEKnet BPPT. Diarsipkan dari versi asli tanggal 2009-12-31. Diakses tanggal 2009-12-09. 
  9. ^ Pythium vexans Archived 2013-05-17 at the Wayback Machine di laman Widely Prevalent Fungi
  10. ^ "Question No. 18085: Is it true that durian seeds are poisonous?". Singapore Science Centre. 2006. Diarsipkan dari versi asli tanggal 2008-02-20. Diakses tanggal 2008-11-20. 
  11. ^ Mahdi Jufri, Rosmala Dewi Akhmad Ridwan Firli. 2006. Studi kemampuan pati biji durian sebagai bahan pengikat dalam tablet ketoprofen secara granulasi basah. Archived 2010-12-26 at the Wayback Machine Majalah Ilmu Kefarmasian 3:78-86.
  12. ^ "USDA National Nutrient Database" Archived 2015-03-03 at the Wayback Machine. U.S. Department of Agriculture. Diakses tanggal 2008-11-20. 
  13. ^ a b Heyne, K. 1987. Tumbuhan Berguna Indonesia, jil. 3. Yay. Sarana Wana Jaya, Jakarta. Hal. 1341-1343.
  14. ^ Oen Liang-Hie dan M. Soemartini. 1998. The presence of 5-hidroxy-methyl-furfural in the shells of the durian fruit (Durio Zibethinus Murr.) as minor deodorant and its possible role in the ripening process of the fruit Archived 2008-08-30 at the Wayback Machine (5-OH-metil-furfural pada kulit buah durian sebagai deodoran minor dan kemungkinan perannya dalam proses pemasakan buah).

Pranala luar

babak
Dijumput matan "https://bjn.wikipedia.org/w/index.php?title=Durian&oldid=99831"