Maritam

Maritam (Naphelium Ramboutanake Leenh) salah asa buah khas matan Kalimantan. Buah maritam ngini mirip lawan buah rambutan mun kulit inya nang balain. Rambutan ada rambut, tagal maritam ada duri tumpul. Warna kulit buah maritam wayah sudah masak bawarna habang hati. Rasa buah maritam ngini labih ka hambar, manis sadikit tagal masam. Lamun dibandingakan lawan rambutan, buah maritam ngini sama ganal lawan rambutan. Daging buah maritam bawarna putih nang malikapi biji buah inya jadilah ngalih tapisah wayah dimakan.

Urang Banjar mangarani maritam marga tanaman ngini mirip buah rambutan wan bawarna habang kahirangan. Kalu urang Dayak Kalimantan Tengah ngaran buah ini tenggaring.

Musim babuah maritam ngini tajadi wayah musim hujan sakitar bulan Uktubir –- Disimbir. Tanaman maritam kawa ditamui di hutan Kalimantan, dataran randah sampai 300 m di atas pamukaan laut. Buah maritam tumbuh subur di dairah nang curah hujan tinggi wan banyu kada calap.

Buah maritam salain dipakai buahnya, batang kayunya nang karas kawa jua dipakai gasan kaparluan rumah tangga nang kaya pakakas rumah tangga, bahan bangunan, wan kayu bakar. Daun buah maritam dipakai gasan parindang palatar rumah atawa kabun masarakat.