Lukisan Lascaux

Lukisan Lascaux adalah lukisan dinding nang baandak di guha Lascaux di Dordogne di Prancis.^[1] Lukisan dinding ngini manggambarakan banyak macam sapasies binatang wan gambar manusia nang dilukisakan lawan warna tanah berpigmen coklat, hirang, kuning wan habang.

Pigmen-pigmen ngiini dihasilakan matan oker, hematit, wan mangan nang digambarakan di muhara dinding batu kapur nang bawarna putih.^[1] Saniman Lascaux maulah gambar-gambar ngini mamakai cara manggambar garis pamulaan wan mawarnainya lawan pigmen.

Lukisan Lascaux marupakan salah sabuting karya sani Paleolitikum nang paling mancungul.^[1] Saniman prasajarah kawa maulah ilusi garakan wan manangkap intisari matan sabuting sapasies lawan pina kaya malabih-labihakan figur karakternya.

Sapalihan lukisan ngini adalah lukisan sapi-sapi nang baandak di lukasi guha nang dingarani Ruangan Sapi nang Bukah.^[1] Diparkiraakan lukisan ngini diulah sakitar 15.000 SM-13.000 SM. Lukisan di atas batu kapur ngini pina kaya bacampur lawan lukisan binatang nang lain gara-gara saniman guha Paleolitikum kada suah mahapus gambar nang tadahulu imbah malukis lukisan nang hanyar. Sapi-sapi nang baandak di dinding ngiini maulah impresi saakan-akan buhannya ngini manaiki bukit.

Manurut teori, lukisan ngini diulah sabagai simbul panangkapan binatang wan imbah ngitu digambarakan nang kaya apa panangkapan tadi di dinding guha.^[1] Salah sabuting lukisan nang baisi interpretasi nang balain adalah lukisan Kuda Cina nang baisi gambar manggalumbung nang kamungkinan kuda bini nang batianan. Dingarani Kuda Cina gara-gara pina mirip lawan kuda keramik matan Dinasti Han. Parak gambar kuda ada 2 ibuting iustrasi diagonal nang kaya pararel lawan gulu kuda wan nng sabutingnya lagi dibagian bawah parut kuda. Ilustrasi nguni diparkiraakan tanaman atawa anak panah. Tapi kada dikatahui kanapa tanda-tanda ngitu diandak lawan kuda nang jadinya maulah ngalih gasan maartiakan karya Paleolitikum ngutu.

Lihat jua

Seni prasejarah
Arkeologi di Eropa
Lukisan dinding
Lukisan purba

Pranala luar

(Bahasa Inggris)The Cave of Lascaux
(Bahasa Inggris)Lascaux Archived 2015-01-22 at the Wayback Machine

Referensi

^ ^a ^b ^c ^d ^e Adams, Laurie Schneider (2001). A History of Western Art. McGraw-Hill. ISBN 0-07-231717-5.

[satu-1] Adams, Laurie Schneider (2001). A History of Western Art. McGraw-Hill. ISBN 0-07-231717-5.

[1]